అమ్మ

అమ్మ గురించి ఇప్పటికి వేల వేల కవితలు,కావ్యాలు వచ్చేసి ఉంటాయి ..అయినా అమ్మ గురించి చెప్పమంటే ప్రతి ఒక్కరు తమ అనుబంధాన్ని గుర్తు చేసుకుని ఆనంద పడిపోతాం ... నేనెప్పుడూ అమ్మ కి మదర్స్ డేలు, అమ్మకి బర్త్ డే లు జరపలేదు .. అసలు అమ్మ,నాన్న పెళ్లి రోజు కుడా నాకు తెలియదు .. కాని అమ్మ నా జీవితం లో ఒక ముఖ్య భాగం ..

చిన్నపుడు మా అక్క ,చెల్లిళ్ళం చిన్న విషయం చెప్పాలన్నా మా నాన్న దగ్గరకు పరిగేట్టేవాళ్ళం .. పొండే మీకు మీ నాన్న ఇష్టం ..నేను కనబడను అని అమ్మ అప్పుడప్పుడు ఉడుక్కునేది ... కాని అమ్మ ప్రభావం మా మీద ఎంత ఉందో మా పెళ్ళిళ్ళు అయ్యాకా గాని తెలియలేదు..

అమ్మ దగ్గర నేర్చుకున్న అతి ముఖ్య విషయం.. పని ని ఇష్టం గా చేయాలి గాని కష్టం గా చేయకూడదు అని .. అమ్మ ని చిన్నప్పటి నుండి చూస్తున్నా .. ఏ పని అన్నా ఇట్టే చేసేస్తుంది ... అస్సలు విసుక్కోదు..పని మనిషిని పెట్టదు, నీకెంత ఒపికమ్మా అనగానే ..ఎవరికిరా చేస్తున్నా నా పిల్లలకే కదా ...అయినా ఇప్పటి నుండే మనం ఒకరి మీద ఆదారపడ్డామనుకో వయసు ఎక్కువయ్యే కొద్ది అసలు చేయలేము.. బండెడు అంట్లు చూసి భయ పడే కన్నా వాటిని ముందేసుకుని నీకు నచ్చిన నాలుగు పాటలో ,లేక మరేదన్నా పనికొచ్చిన విషయం గురించో ఆలోచిస్తూ తోమేసుకుంటే పనికి పని అయిపోతుంది , శ్రమా తెలియదు ... అనేది ... ఇప్పుడు సింకు నిండా గిన్నెలు చూడగానే ఒక సుశీల ,జానకి ని అయిపోతూ ఉంటా ఆ విషయం గుర్తు తెచ్చుకుని ...


ముఖ్యం గా అత్తింటి లో ప్రతి విషయం పుట్టింటికి చెప్పడం అసలు ఇష్ట పడేది కాదు .. మనకు వచ్చే చాలా సమస్యలు మనం పరిష్కరించుకోగలం .. వాటిని చాంతాడులా ఉహించుకుని ఎక్కడో ఉన్న అమ్మా నాన్న్నలను భయ పెట్టడం మంచిది కాదు ..సమస్య మన చేతులనుండి జారిపోతుంది అన్నపుడే చెప్పాలి అనేది.. తను పెళ్లి అయికోత్తగా మా ఇంటికొచ్చినపుడు మా నాన్న వాళ్ళ ఇల్లు తాటాకుల ఇల్లు అంటా , అది కుడా కాస్త వర్షం వస్తే కారిపోయేది .. అప్పుడు అమ్మ నగలు ,పెద్దమ్మ నగలు మొత్తం అమ్మేసి అప్పు చేసి మా ఇల్లు కట్టారు.. పైగా మరుదులందరూ చిన్నపిల్లలు,నాన్న ,పెదనాన్న సంపాదన మీదే కుటుంభం అంతా నడవాలి .. ఒక్కో సారి మాకు పాలు ఇవ్వడానికి కుడా ఇంట్లో పాలు సరిపోయేవి కావంట.. అప్పుడు పెద్దమ్మ ,అమ్మ పాలకు బదులు నీళ్ళ లో పంచదార కలిపి పట్టేవారంటా.. అమ్మా మరి నీకు కోపం రాలేదా ..నీ నగలన్నీ అమ్మేస్తే .. పైగా సొంత ఇల్లు కాదు ఇది ఉమ్మడి కదా ..మీ డబ్బులతో పిల్లలకు పాలు కుడా కొనలేక పోతున్నందుకు బాధ కలిగి అమ్మకు ,నాన్నకు చెప్పలేదా అంటే ...ఏమోనమ్మా అప్పుడు అందరం తడవకుండా ఇల్లు కట్టుకుంటున్నాం అని అనిపించేది నాకు,పెద్దమ్మకు .. అంతకు మించి ఏమి తెలిసేది కాదు ..,,, పైగా మీ చిన్నాన్నలందరూ చిన్న పిల్లలు , మేము వదిలేస్తే ఎవరు చూస్తారు , మీకు సరి అయిన తిండి పెట్టక పోవడం బాధ అనిపించేది కాని అప్పుడు మాకు సొంత కాపురాల ఆలోచనే వచ్చేది కాదు .. పోనిలే ఆ పుణ్యమేనేమో అందరం బాగున్నాం అనేది..


అలాగే పుట్టింటిని అస్సలు తేలిక చేసేది కాదు .. మా మావయ్య మా తాతగారి ఆస్తులను మొత్తం కరగపెట్టేసాడు వ్యాపారాల పేరు చెప్పి .. ఎప్పుడన్నా అక్క ఆ విషయం మాట్లాడిందో అసలు ఊరుకునేది కాదు మా ఆస్తి విషయం మా నాన్న ,తమ్ముడు చూసుకుంటారు మీకెందుకు అని కంట నీరు పెట్టేసేది .. దెబ్బకి మా నాన్న మాకు వార్నింగ్ ఇంకోసారి ఆ విషయం ఎత్తారంటే ఊరుకోను అని ...అలాగే అత్తలు ఇంటికొస్తే చిన్నపిల్లలా ఎంత సంతోష పడిపోతుందో ..వాళ్లకు తన చీరలు ఇస్తుంది .. ప్రేమ గా మాట్లాడుతుంది ... ఆడపడుచు అధికారం చూపదు..


ఇలా అమ్మదగ్గర చాలా విషయాలు నేర్చుకున్నాను ..చిన్నపుడు ఒక సారి ఏదో చిన్న తప్పు చేసాను ,వెంటనే కొంత డబ్బు నష్టపోయాను .. అప్పుడు కోపం వచ్చి ఎందుకమ్మా దేవుడు పెద్ద తప్పులు చేసిన వాళ్ళను ఏమి అనడు .. మంచి వాళ్ళు చిన్న తప్పు చేస్తే మాత్రం వెంటనే శిక్ష వేస్తాడు అనగానే ఎందుకంటే మంచివాళ్ళు మళ్లీ మళ్లీ ఆ తప్పు చేయకుండా వెంటనే చుపుతాడన్నమాట... చెడ్డ వాళ్ళకు ముందు ముందు ఉంటుంది అని అనేది ..అమ్మను చూస్తేనే దైర్యం గా ఉంటుంది ...


అమ్మకు వాణిశ్రీ అంటే చాలా ఇష్టం .. వాణిశ్రీ చాలా బాగుంటుంది కదా అనేది టి వి లో చూస్తూ .. మా చెల్లి తెగ ఏడిపిస్తుంది .. ఏం టేస్ట్ అమ్మా .. నెత్తి మీద కుండ బోర్లించినట్టు ఆ హెయిర్ స్టైల్ అదినూ .. గంగ,మంగ సినిమా చూసాక ఇంకా దాని సినిమా చూడకూడదని ఒట్టేసుకున్నా అనేది .. ఏడ్చావులే,ఈ రోజు మీరు కడుతున్న చీర స్టైల్స్ అన్ని ఆ రోజు అది కట్టినవే అని ఉడుకున్నేది ... ఇప్పటికీ చెల్లి అమ్మను వాణిశ్రీ గారు అన్నం ఉడికి పోయింది కాస్త వార్చండి అని ఆ పేరుతోనే పిలిచి ఏడిపిస్తుంది ...


అమ్మకు బాగా చిన్న వయసులోనే పెళ్లి చేసేసారు పెళ్లి నాటికి తనకి 15 అంటా, 20 వచ్చేసరికి మేము పుట్టేసాము ... అందువల్ల ఎక్కడికి వెళ్ళినా మీ అక్క గారా అని ఎవరన్నా మమ్మల్ని అంటే అమ్మ ఫేసు ,నాన్న ఫేసు విడి విడి గా చూడాలి ... భలే నవ్వు వచ్చేది ... ఒక సారి అక్క అమ్మను బలవంతం గా కూర్చో పెట్టి బాగా మేకప్పు వేసి మంచిగా తయారు చేసి ఫోటో తీసింది ... అందులో అమ్మ ఎంత బాగుందో .. అమ్మ ఇప్పటికిని ఆ ఫోటో చూసుకుని మురిసిపోతుంది ... పాపం ఎప్పుడు తన చిన్న చిన్న కోరికలు కూడా బయట పెట్టేది కాదు ...


నా జీవితం లో మరచిపోలేని రోజు అమ్మ ,నాన్నఇక్కడకు రావడం .... అమ్మ తన పుట్టిన వూరు, మా వూరు తప్ప వేరే పట్టణానికి వెళ్ళలేదు .. ఒక సారి నాన్న హైదరాబాద్ తీసుకు వెళితే చార్మినార్ నీ కనురెప్ప ఆర్పకుండా ఎంతో ఆసక్తిగా చూసింది అంట .....అలాంటిది ఇక్కడ అంబరాన్ని తాకే భవంతులు విదేశీయులను ,ఇక్కడి జీవన స్థితిగతులను చూసి అమ్మ ఎంత సంతోషించిందో ..వణుకుతున్న చేతులతో నా చేయి పట్టుకుని అలా అన్నీ చిన్న పిల్లలా చూస్తూ ఉంది ...


అమ్మ ఇండియా వెళ్ళాకా, ఒక సారి ఫోన్ చేస్తే చెల్లి మాట్లాడింది .. అమ్మా తల్లీ నువ్వు బాగానే అన్నీ చూపావు గాని ఇక్కడ మమ్మల్ని ఒక రేంజ్ లో తినేస్తుంది అనుకో.. నువ్వు గ్రీన్ లైట్ వస్తే అమ్మ చేయి ఇలా పట్టుకుని రోడ్ దాటించావ్ అంట అని మా చేతులు పట్టుకుని రోడ్ కి అవతల తీసుకుపోయి మరి చూపిస్తుంది.. చిన్నపుడు నేను దాని చేయి పట్టుకుని నడిపిస్తే అది ఈ రోజు నా చేయి పట్టుకుని నడిపించింది అని మద్య మద్య సెంటిమెంట్ డైలాగ్స్ ఒకటి .... పోనీ అక్కడితో ఊరుకుందా పెద్ద జోకు ఒకటి పేల్చింది ... ఒకసారి ఏదో పార్టికి నువ్వు తయారు అయితే అచ్చం హేమా మాలినిలా ..ఏది , అక్షరాలా మన డ్రీం గర్ల్ హేమామాలినిలా అనిపించావంట.. పాపం మద్యలో వాళ్ళెందుకు లేమ్మా ..ఏదో ముంబాయిలో ప్రశాంతం గా బ్రతుకుతున్నారు వింటే బాధ పడతారు అన్నా వినిపిన్చుకోదు ... అని ఏడిపిస్తూ ఉంటే నోర్ముయ్యి గాడిదా నీకెందుకే అంత కుళ్ళు మా అమ్మ నన్ను పొగుడుకుంటే అని తిట్టాను ..లేకపొతే ఎంటక్కా,ఇప్పటికీ 89 సార్లు చెప్పింది ... ఇంకో 11 సార్లు చెబితే సెంచరి కొట్టేస్తుంది.. వచ్చిన వాళ్లకు, వెళ్ళిన వాళ్లకు ఆ ఫోటోలు చూపడం ,పొగడటం అంటుంటే 89 కాదు 999 సార్లు చెప్పినా వినాల్సిందే అని ఫోన్ పెట్టేసా ...


ఇలా ఎవరి అమ్మ గురించి వారు పుంఖాను పుంఖాలు గా రాయచ్చు ... కొసమెరుపేంటంటే ఎంత సేపూ మీ అమ్మ గురించేనా రాయడం ,మీ అత్తగారి గురించి ఏమీ రాయవా అన్నారు మావారు,నాకేం తెలుస్తుంది మీ అమ్మగారి గురించి మద్యలో వచ్చాను అంటే ఛా అంటూ వేటకారం చేసారు ,సరే మీరూ చెప్పండి మీ అమ్మ గారి గురించి అనగానే నవ్వేసుకుంటూ మరి చిన్నపుడు మా అమ్మ నేను ఎంత అల్లరి చేసినా ఏమీ అనేది కాదు ,నేను వీదిలో పిల్లలందరినీ కూడెసుకుని గోళీలాట ఆడి గంపలు గంపలు గోళీలూ తెచ్చి ఇంట్లో దాచేవాడిని..చెప్పేది ,చెప్పేది .. ఇల్లంతా చెత్త చేయకని.. నేను వినను కదా వాటిని తీసుకుపోయి బావిలో పడేసేది ..బావి పూడిక తీసేటపుడు తెగ వచ్చేవి.. ఇంకా పెద్ద పెద్ద తొట్టేలలో రంగు రంగుల చేప పిల్లలు వందల కొద్దీ పెంచేవాడిని ..వద్దురా అంటే వినేవాడిని కాదు ..ఇంట్లో నీళ్ళు అన్నీ వీటి కోసం వాడెసే వాడిని ... ఇంకా ఫ్రెండ్స్ అందరినీ ఇంటికి తీసుకొచ్చి అమ్మ చేసిన తినుబండారాలన్నీ పంచే వాడిని.. ఆంలెట్ లేకపోటే అన్నం తినే వాడినే కాదు.. పాపం ఓపిక లేకపోయినా వేసేది నా కోసం అని ట్రైన్ బండిలా చక చక చెపుతున్న మా ఆయన్ని ఆపి ఇంక ఇప్పుడు మా అమ్మ గురించి చెప్పండి అన్నాను .. మీ అమ్మ గురించి నేనేం చెప్పను నాకేం తెలుస్తుంది అన్నారు.. నేను నవ్వితే ,అర్దమైనట్లు హమ్మనీ నువ్వు తక్కువదానివి కాదు అని ఉడుక్కున్నారు

కాబట్టి ఎవరి అమ్మ గురించి వాళ్ళూ గ్రంధాలు రాసేయచ్చ్చన్న్నమాట :)

నా పెళ్లి చూపులు

పెళ్ళికి ముందు అందరు అమ్మాయిల్లాగే నాకూ కాబోయే శ్రీవారి మీద అనేక ఆలోచనలు వచ్చేవి ..ఎప్పుడన్నా మేడ మీద కరెంట్ పోయినపుడు వెన్నెలలో అటు ఇటు పచార్లు చేస్తూ .. ఈ వేళ లో నీవు ఏం చేస్తూ ఉంటావో ,అనుకుంటూ ఉంటాను ప్రతి నిమిషము నేనూ .....అని ఎవరికీ వినబడకుండా పాడేసుకుంటూ ఆలోచించేదాన్ని ... ఈ టైం లో ఏం చేస్తున్నాడో ,వ్యాపారమా ? ఉద్యోగమా? లేక ఇంకా చదువుకుంటున్నాడా.. ఒక వేళ పక్కింటి అమ్మాయికో ,ఎదురింటి అమ్మయికో సైటు కొడుతూ బిజీగా ఉన్నాడా ? లాంటి వాటి తో పాటు ఎలాంటి వాడు వస్తాడో అన్న భయం కూడా ఉండేది ...


అయితే చిన్నపుడు బావిలో కప్పలాగా ఎంత సేపూ మా కాలేజ్ కి వెళ్లేదారి లో చిన్నపాటి షాపులు ,దుకాణాలు చూస్తూ పెరిగానేమో ..నా ఊహల్లో కూడా మా ఆయన పుస్తకాల షాపు ఓనర్ లాగా , బట్టల షాపు వాడిలా తప్ప ఇంకోరకం గా కనిపించేవారు కాదు ...( ఈ పోస్ట్ చదివినట్లయితే మా ఆయనకు ఈ వాక్యం కనబడ కూడదు గాక ) .. సరే తరువాత తరువాత సినిమాల్లో రిక్షా వాడు కూడా డ్రీమ్స్ విదేశాల్లో తప్ప ఇండియా లో ఊహించుకోక పోవడం చూసాకా ...అరె ...రే అని నాలుక కరుచుకుని పాపం మా ఆయనకి ఇస్త్రీ షర్టు , టై కట్టాఅనుకోండి ...


సరే మొత్తానికి నాకూ పెళ్లిచూపుల తతంగానికి టైము వచ్చేసింది.. ఒక రోజు ఉదయాన్నే ఆరు గంటలకు అమ్మ హడావుడిగా నిద్ర లేపి మొహానికి కాస్త గంధం రాసుకోవచ్చు కదమ్మా అంది ... అసలే మాంచి నిద్రలో ఉన్నానేమో పిచ్చ కోపం వచ్చింది ..కాని అరిచే ఓపిక లేక మళ్లీ ముసుగుతన్నాను ....కాని అప్పటికే మన బుర్ర పాదరసంలా పనిచేయడం మొదలు పెట్టింది .. మొహానికేమన్నా రాస్తే గయ్యిమని అరిచే అమ్మ ఇంత ప్రొద్దున్నే పిలిచి మరీ, ఏదన్నా రాయమంటుంది అంటే పెళ్లి చూపులన్నమాట .. మొన్నే ఒక ఫోటో చూపారు ... అందులో అబ్బాయిని చూడగానే ....అబ్బా ఎంత బాగున్నాడో అనిపించలేదు, పోనీ ఇలా ఉన్నాడు ఏంటబ్బా అనిపించలేదు.. అసలే ఫీలింగు కలగ లేదు ... కుదరినప్పుడు ఆలోచిద్దాం లే అనుకున్నాను.. కాని ఇలా హడావుడిగా వస్తాడు అనుకోలేదు ...ఈ లోపల మా పిన్ని బలవంతం గా లేపి తయారుచేసింది ...


అసలే నిద్ర మద్యలో లేపారు ..అందులోను నాన్న,పెదన్నాన్న, చిన్నాన్నలందరి ముందు ఎవరో అబ్బాయి ని చూడటం ఒక ఎత్తు అయితే , సంతలో పశువులా ఇప్పుడు అక్కడ కుర్చోవాలన్న ఆలోచన మరొక వైపు ఉక్రోషం తెప్పిస్తుంది ... ఇంక ,మా పిన్ని దొరికిందే చాన్స్ అన్నట్లు వీదిలో వెళ్ళే ప్రతి పువ్వు నా జడలో తురిమేస్తుంది .. ఆ విషయం మీద పేచి పెడుతున్న నాకు, పెళ్లి కొడుకు వచ్చేసాడు అంట అనే మాట వినగానే చిరాకు ప్లేసులో కొంచెం ఆసక్తి .. అప్పటి వరకు నా చుట్టూ ఉన్న జనాలు ఒక్కరు కూడా పక్కన లేకుండా చూడటానికి వెళ్లిపోయారు ... మా చెల్లి అటుగా వెళుతూ కనబడింది.. పిలిచి అడుగుదాం అనుకున్నాను ఎలా ఉన్నాడు అని .. మళ్లీ భయం ఏమనుకుటుందో అని ... ఈ లోపల మిగిలిన వాళ్ళు నా దగ్గరకు వస్తూ ఫోటో లో కంటే బయట చాలా బాగున్నాడు కదా ,అసలు ఫోటో కి బయటకు సంభందమే లేదు అనుకోవడం వినిపించింది .. వీళ్లు కావాలని అంటున్నారా .. లేక నిజమా ? నాకేం పెద్ద ఆసక్తి లేనట్లు మొహం పెట్టి కూర్చున్నాను ..


ఈ లోపల నన్ను రమ్మన్నారు.. ఇదిగో తల వంచుకుని కూర్చో ,వాళ్ళు అడిగిన వాటికి సమాధానం చెప్పు..మా అమ్మమ్మ నస.. గాడిద గుడ్డేం కాదు ..నేనెందుకు తలవంచాలి ..కుదర్దంతే .. అని విసురుగా అని లేచి ఎదురుగా మా నాన్నను చూడగానే టక్కున బుద్దిగా తల వంచేసాను ... మాదే పెద్ద కుటుంభం అంటే తనది మూడురెట్లు పెద్ద కుటుంభం అంట .. ఒకటే జనాలు ... పెళ్లి చూపులా.. పెళ్ళా ? అని ఒక డవుటు వచ్చింది ... ఎదురుగా కూర్చున్నాను గాని అబ్బాయిని ఎలా చూడాలో తెలియడం లేదు... అందరు నన్నే చూస్తున్నారేమో ??... చూస్తే ఏంటి !! .. అసలు ఒకరినొకరు చూసు కోవడానికే కదా పెళ్లి చూపులు.. అయినా ఎందుకు భయం గా ఉందొ తెలియడం లేదు , ఏదో మామూలుగా ఎక్కడో చూస్తున్నట్లు గా తల ఎత్తి ఒక్క సారి ఎదురుగా చూసాను .. దెబ్బకు అయోమయం లో పడిపోయాను.. ఎదురుగా ఒక 20 మంది .. అందులో 10 మంది మగవాళ్ళు ..ఇందులో పెళ్లి కొడుకేవరు??? పక్కకు చూస్తే నాన్న నా వైపే చూస్తూ ఉన్నారు.. ఎవరిని చూసినా ఏమనిపించదు గాని నాన్నను చూస్తే మాత్రం భయం ..


సరే మా ఇద్దరినీ మాట్లాడుకోమంటారుగా అప్పుడు చూద్దాం లే అనుకున్నాను .. అబ్బే.. వాళ్ళ గోల వాళ్ళదే గాని నా గొడవ ఎవరూ పట్టించుకోరు.. అటు అబ్బాయి పరిస్థితి కూడా అదే ... అందులోను అమ్మ చిన్ననాటి ఫ్రెండు వాళ్ళ బంధుగణం లో ఉంది .. ఇంకేం మా అమ్మ అక్కడ బిజీ ... నాన్న కి కూడా అందులో తెలిసిన వారున్నారు ... అబ్బాయి గుణగణాల లిస్టు సేకరించడం లో నాన్న బిజీ .. ఇంకా పెళ్లి చూపులై పోయాయి పదండి ...పదండి అన్నారు ... అటు వాళ్ళు ఇటువాళ్ళు టాటాలు బై ,బై లు చెప్పేసుకుంటున్నారు ... నాకు కంగారు వచ్చేసి హడావుడిగా తిరుగుతున్న అక్కని పిలిచి .. అక్కా ఇదన్యాయమే పెళ్లి కొడుకును చూడలేదు నేను అన్నాను.. అక్క నా వైపు విచిత్రం గా చూస్తూ మరి అంత సేపూ అక్కడేం చేసావే అంది ... నా బొంద .. అసలు ఎవరన్నా ఎదురుగా అంత మందిని కూర్చో పెడతారా .. ఎవరూ అందులో తెలియలేదు.. పైగా నాన్న ఒకరు ఎదురుగా .. నాకేమో భయం వేసింది చూడటానికి అన్నాను ....ఏడ్చినట్లుంది .. మరీ అంత సిగ్గు అయితే ఎలాగా .. సరే నాతో రా అని కటకటాల దగ్గర కు తీసుకు వెళ్లి అదిగో ఆ బిస్కెట్ కలర్ షర్ట్ వేసుకున్నాడు చూడు ఆ అబ్బాయే అని చెప్పి వాళ్ళ దగ్గరకు వెళ్ళిపోయింది ...


ఇక నా పాట్లు చూడాలి ఒక మనిషిని చూడటం ఇంత కష్టమా అనిపించింది.. తను సినిమాలో హీరోయిన్ లా మొహానికి ఏదో ఒకటి అడ్డం గా పెట్టుకుని నించుంటాడు.. కాసేపు ఎవరో అడ్డు వస్తే ఇంకాసేపూ మందారాలో చేమంతుల కుండీలో అడ్డు వచ్చేవి ... ఇంక విసుగు వచ్చి ఎహే పో ... సంబంధం కుదిరినప్పుడు కదా సంగతి అనుకుని ఇంట్లో కొచ్చేసాను.. వాళ్ళు వెళ్ళ గానే నాన్న నన్ను రూం లోకి పిలిచి ఏమ్మా నీ అభిప్రాయం ఏమిటి అన్నారు.. ఒక్క సారిగా కంగారు వచ్చేసింది నాకు ఏం చెప్పాలో తెలియక .. అబ్బాయి చాలా మంచాడు ..చదువుకున్నాడు ..చక్కని జాబ్ ...మనలాగే మంచి పేరున్న పెద్ద కుటుంభం ..కాకపొతే ఒకే ఇంట్లో ఉండరు అన్ని పక్క పక్క ఇల్లులు ...అన్ని రకాలుగా మాకు నచ్చింది ..నువ్వేమంటావ్.. ఇదిగో చూడు నీకు నచ్చక పొతే ఇప్పుడే చెప్పేసేయి .. ఒక్క మాట కూడా ఎందుకు నచ్చలేదు అని అడగను.. కేన్సిల్ చేసేస్తాను అన్నారు ...నాకేం చెప్పాలో తెలియడం లేదు ...అబ్బాయిని చూడలేదు అంటే నమ్మరు ..నేను తలెత్తి చూసినపుడు నాన్న నన్ను చూసారు ..ఒకవేళ అన్నా సరే ఫోటోలో చూసావ్ కదా అంటారు ..బయటకు ఫొటోకు తేడా ఉంది అంట కదా అంటే చండాలం గా ఉంటుందేమో .. అయినా ఫేసులో ఏముందిలే ..అబ్బాయి తో మాట్లాడించలేదు .. ఎలాంటి వాడో ???... హుమ్ ఒక అయిదు నిముషాలు మాట్లాడితే మాత్రం ఏం తెలిసి ఏడుస్తుంది .. నీ జీతం ఎంత ..నీది ఏం కంపెని .. ఏం హాబీలు లాంటివే గా ... నా ఆలోచనలు ఆపేస్తూ .. ఏంటి అబ్బాయి నచ్చలేదా అన్నారు ఆత్రుతగా .. అబ్బే అదేం లేదు నాన్న మీ ఇష్టం నాకు మాత్రం ఇలాంటివి ఏం తెలుస్తాయి అన్నాను .. మా నాన్న మొహం వెలిగిపోయింది ...


ఎలా ఉన్నాడు అబ్బాయి అంది అక్క రాత్రి పడుకున్నపుడు ... ఏమో ,మహానుభావుడు మొహం కనబడకుండా తెగ జాగర్త పడ్డాడు .. ఏమే నిజం చెప్పు .. పర్లేదా బాగానే ఉన్నాడా అన్నాను ... ఓసి గాడిద దేనికి పనికోస్తావే .. సరేలే రేపు ఇళ్ళ చూపులకు వెళుతున్నాం గా అక్కడ ఫోటో ఏదన్నా తెస్తాలే అంది ...అయినా జాతకాలు నప్పాలి .. వాళ్ళ పద్దతులు నచ్చాలి అప్పుడు కదా సంగతి అని పడుకున్నాను ... ఆ మరుసటి రోజు అమ్మ ,నాన్న పిన్నులు, పెద్దమ్మ,చిన్ననా ,పెదనాన్న పొలోమని వెళ్లిపోయారు వాళ్ళింటికి ... ఆ రాత్రి 10 గంటలకల్లా వస్తామన్నా వాళ్ళు 12 అయినా రాలేదు ...నాకు టెన్షన్ ఇక్కడ ... తరువాత నాన్న కాల్ చేసారు .. అమ్మా.. ట్రైన్ ప్రొబ్లెమ్ వచ్చి ఆగింది .. కంగారు పడకు అని ..హమ్మయ్య దేవుడా అనుకుని దణ్ణం పెట్టుకుని పడుకున్నాను .. ఆ తెల్లవారు జామున ఎప్పుడో నిద్ర పట్టింది ...


ఒకటే గల గల మని మాటలు వినబడటం తో మెలుకువ వచ్చింది ... .. అమ్మ నా చేయి పట్టుకుని తన బుగ్గకు ఆనించి మిగిలిన వాళ్ళతో మాట్లాడుతుంది ... లేచి కూర్చున్నాను .. ఏమైంది ఇంత లేటు అన్నాను.. వాళ్ళు రాత్రి పడ్డ కష్టాలన్నీ ఏకరువు పెట్టారు ... అమ్మా వాళ్ళు లాంచనాల గురించి ,పెళ్లి కానుకల గురించి మాట్లాడుకోవడం విని ఏంటి సంభందం కుదిరిపోయినట్లేనా అన్నాను అనుమానంగా.. కుదిరిపోయినట్లు కాదు కుదిరింది అంది పిన్ని ... ఎందుకో ఒక్క సారిగా మనసులో అది భయమో బెంగో మరొకటో తెలియదు గాని సన్నగా వణికాను..దేవుడిని దణ్ణం పెట్టుకున్నా.. అప్పుడే అమ్మ కళ్ళలో నీరు తెచ్చేసుకుంటూ ఇదిగో నాన్నా ... అక్కడ ఇక్కడలా చిన్న పిల్ల వేషాలు వేయకూడదు ..నువ్వే పెద్ద కోడలివి ...అందరూ పెద్ద కుటుంభాలు .. జాగ్రత్త గా ఉండాలి ... అంటూ అప్పగింతలు మొదలెట్టేసింది ....


మా బెంగను తేలిక చేయడం కోసం అనుకుంటా మా ఆఖరి చిన్నాన మొదలు పెట్టేసాడు .. ఊరుకో వదినా అది బెంగ పడటం ఏంటి .. మొన్న పెళ్లి చూపుల్లో చూసావా ఆ అబ్బాయిని ఎలా చూసిందో అన్నాడు.. ఎవరూ నేనా .. నీకో విషయం తెలుసా అసలు నేను ఆ అబ్బాయిని చూడలేదు అన్నాను కోపం గా .. ఛా.. అందుకేనేంటి వెళుతున్నపుడు కటకటాల నుండి తొంగి మరి చూస్తున్నావ్ ..నేను గమనించలేదేంటే .. అన్నీ చూస్తున్నా ...అన్నాడు ఉడికిస్తూ .. ఎహే ..పో ..నిజం గా నాన్న .. అసలు చూడలేదు ..అందుకే అక్క అక్కడినుండి చూడమంది.. అక్కడ కూడా చూడలేదు సరిగా అన్నాను ...కోయ్..కోయ్ అన్నాడు .. నీ ఎంకమ్మ నిజంగా ...చెపితే నమ్మవే .. అయినా ఎదురుగా అంత మందిని ఎవరన్నా కుర్చోపెడతారా .. పోనీ నన్ను ఏమన్నా ఆ అబ్బాయితో మాట్లడించారా .. మళ్లీ నేను చూసా అని అంటున్నారు అన్నాను కోపం గా .. అయ్యా బాబోయ్ చూసావా అక్కా .. ఆ అబ్బాయితో మాట్లాడలంటా ..మనరోజులు కావు మిగిలిన వాళ్ళు మొదలు పెట్టేసారు ...


నువ్వేమో గాని ఆ అబ్బాయి మాత్రం నిన్నే చూస్తూ కూర్చున్నాడు పాపం .. వెళ్ళేటప్పుడు కూడా నువ్వు కనబడతావేమో అని తెగ చూసాడు అన్నాడు చిన్నాన.. చెవిలో పువ్వులేమన్న కనిపిస్తున్నాయా అని పైకి అన్నా గాని మనసులో ఎక్కడో గర్వం ...మళ్లీ తనే అన్నాడు మీ ఇల్లు చాలా బాగుంది ,మీ ఆయన రూం కూడా ... అన్నట్లు మర్చిపోయానే మీ ఆయన గదిలో కాజోల్ ఫోటో ఉంది ... ఫేన్ అనుకుంటా ..ఇప్పుడు చూడండి, ఇక కాజోల్ సినిమాయే చూడదు .. పెళ్లి కాగానే ఆ ఫోటో పీకి పడేస్తుంది అన్నాడు ..అమ్మా చూడమ్మా ,ఎలా అంటున్నాడో ..నవ్వుతావేంటి అన్నాను ఉడుక్కుంటూ .... అసలు విషయం మర్చిపోయాను ... అసలు నీ గురించి ఏదన్నా చేపుతామేమో అని ఎంత ఆశగా చూసాడనుకున్నావ్... మావయ్య గారు ,మావయ్య గారు అని నా పక్కనే ఉన్నాడు తెలుసా అన్నాడు .. నేను నా ఆసక్తి తెలియ నివ్వకుండా మొహం పక్కకు పెట్టేసా.. కాసేపు అలా ఏడిపించి ఎవరి పనులు లో వాళ్ళు పడిపోయారు ..

అప్పుడు గుర్తువచ్చింది అవును ఫోటో తెస్తానంది ఏది అనుకుని దానికోసం వెతికాను.. మా పిన్ని రూం లో గాఢమైన నిద్ర లో ఉంది .. అక్కా ,అని బలవంతం గా నిద్ర లేపేసా .. ఎంటే అంది చిరాగ్గా ... ఫోటో తెస్తానన్నావ్ ... అన్నాను.. ఏం ఫోటో అంది మళ్లీ నిద్రలోకి వెళ్ళిపోతూ .. ఆ అబ్బాయి ఫోటో అన్నాను ... ఏమోనే ఎక్కడో పెట్టేసా ..తరువాత చూస్తాలే అంది .. తంతా... ఒక్క సారి లేచి చెప్పవే అని దాన్ని లేచేవరకు హింస పెట్టేసా ... తిట్టుకుని తిట్టుకుని లేచి వెదికి ఇచ్చింది .. గభ గభ చూసా ఎదురుగా గడ్డం తో పైన తెల్ల జుట్టుతో ,చేతిలో ఒక కర్రతో ,చేతిలో ఒక చిప్పతో ఒక ముసలాడి ఫోటో.. ఎంటే ఇది అన్నాను అయోమయం గా .... మీ ఆయన అంది మళ్లీ నిద్రపోతూ.. కాళ్ళు విరగ కొడతా ... ముందు నిద్రలే అని బలవంతం గా లేపాను .. అది విసుక్కుంటూ ..అబ్బా అది మీ ఆయనా కాలేజ్ లో నాటకం వేసినపుడు ఫోటో అంట తల్లి ... మీ అత్తగారు చెపితే చూడకుండా ఆల్బం లో నుండి దొంగ చాటుగా ఎత్తుకోచ్చా అంది ..నాకు విసుగొచ్చింది ..ఎందుకే నాతో ఇలా ఆడుకుంటారు ..ఇందులో ఏం చూడను ,అయినా అతనికి సరి అయిన ఫొటోస్ లేవా అన్నాను ... అబ్బా ఇంకొకటి తెచ్చాను కాని మీ ఆయనా కమలహాసన్ లాగ ఒక ఫోటోకి ఇంకో ఫోటోకి పోలికే లేదు,ఆ అడుగు ఫోటో చూడు అంది.. ఆ ముక్క ముందే ఏడవచ్చు కదా అన్నాను .. మళ్లీ నిద్రలేపావనుకో చితకోట్టేస్తా జాగ్రత్త అని వార్నింగ్ ఇస్తూ అన్నట్లు మర్చిపోయానే మీ ఇంటి ఎదురుగా ఇద్దరు అమ్మాయిలు ఉన్నారు .. వాళ్ళు మీ ఆయనకు లైన్ వేస్తున్నారో ,వాళ్ళకే తను వేస్తున్నాడో కాస్త గమనించు అని నవ్వింది.. నీక్కుడా లోకువ అయిపోయానే బాబు అనుకుని , మళ్లీ తన ఫోటో చూడటం ఎవరన్నా చూసారో అయిపోతా అని పై మేడ ఎక్కి జాగ్రత్త గా అప్పుడు చూసాను ... ఒక పమేరియన్ కుక్కపిల్లను ఎత్తుకుని ,మెరూన్ టి -షర్ట్ లో చూస్తూ కనిపించారు... మరి పెళ్లి కుదిరిపోయినందుకో ,మరి నిజం గానే బాగున్నాడో తెలియదు గాని .. ఎందుకో నచ్చారు .. మిమ్మల్ని చూడటానికి ఇన్నాళ్ళు పట్టింది సార్... అయినా ఈ ఫోటోలో ఉన్నట్లైనా ఉందా మీ ఒరిజినల్ పేసు అనుకున్నా ...


ఆ వెంటనే తాంబూలాలు ముహూర్తం పెట్టేసారు ... ఇద్దరినీ ఒకరి పక్కన ఒకరిని కూర్చో పెట్టారు గాని ,నేను అసలు తల పక్కకు తిప్పలేదు భయం తో .. ఎటు చూసినా మా చిన్నానా ఆలి లాగా నోట్లో నాలుక బయట పెట్టి ఏడిపించడమే సరిపోయింది ... ఆ రోజు పాపం మా ఆయన నాతో మాట్లాడటానికి శతవిధాల ట్రై చేసారు అంట .. అమ్మో వాళ్ళింట్లో ఇలాంటివి ఒప్పుకోరని వాళ్ళ మావయ్య.. అబ్బబ్బే వాళ్ళే మనుకుంటారని మా వాళ్ళు మళ్లీ మమ్మల్ని మాట్లాడుకోనివ్వలేదు .... చివరకు వెళ్ళేటపుడు మా ఆయన పాపం తన విజిటింగ్ కార్డ్ నాకు అంద చేసి వెళ్ళారు ....
మరో సారి మళ్లీ మరికొన్ని విషయాలు :)

కాల మహిమ

నేనూ,మా అక్క ఒకే ఇంట్లో పుట్టినప్పటికీ మా ఇద్దరికీ ఏ విషయం లోనూ ఒకే అభిప్రాయం ఉండేది కాదు,ముఖ్యం గా డబ్బు విషయం లో అస్సలు లేదు... నేను చిన్నప్పటి నుండి మహా పొదుపు ( అంటే మావాళ్ళు కాస్త వక్రీకరించి పిసినారి అనేవాళ్ళు గాని అది ముమ్మాటికీ పొదుపే అన్నమాట ,మీరు వాళ్ళలా అస్సలు అలా అనుకోకండి,సరేనా ) అలా పొదుపుగా ఉండడానికి ఒక కారణం ఉంది , అది ఏంటంటే నేను ఎప్పుడు మా అమ్మా, నాన్నలు మాట్లాడుకోవడం విన్నా ఆ సంభాషణ ఇలా ఉండేది..

అమ్మ: ఏమండీ ఈ నెల ఒక వెయ్యి రూపాయలు ఎక్కువ కావాలి ఖర్చులకి,మా తమ్మూడి కూతురు ఫంక్షన్ ,ఏదో ఒకటి కొనాలి ..
నాన్న :మొన్న 3000 ఇచ్చాను కదా, అందులో ఏం మిగల లేదా??
అమ్మ: ఇంకేం 3000 బాబు.. ఎప్పుడో అయిపోయాయి మీ పిల్లలకు పండగలకు డ్రెస్సులు కొనద్దా ..పాపం వాళ్ళకు సంవత్సరానికి కొనేదే రెండు జతలు, మద్యలో పండగలకు పుట్టినరోజులకు కొనేదే ఉండదు ..
నాన్న: మరి అంతకు మొన్న 1000 ఇచ్చాను అది??
అమ్మ: ఇంకేం వెయ్యి మీ పెద్దమ్మ గారి అమ్మాయి ఇంటికి వస్తే వాళ్ళకు బట్టలు పెట్టాము కదా
నాన్న: మరి అంతకు ముందో వెయ్యి ఇచ్చాను కదా ... ( ఈ సారి అమ్మకు కోపం ఒక రేంజ్ లో వచ్చేది )అంటే నేనేమన్నా తినేస్తున్నానా అలా అడుగుతారు ,మొన్న ఫలానా వాళ్ళ పెళ్ళి కి చదివింపులు అందులోనుండే ఇచ్చాను, మొన్న చుట్టాల తాకిడికి విపరీతమైన ఖర్చు ,ఈ నెల గ్యాసు ఇట్టే అయిపోయింది పైగా చలికాలం వేడి నీళ్ళూ కూడా కాయాలి కదా ,మీకందరికీ ఎసర్లులా మరగకపోతే స్నానం చేసినట్లే ఉండదాయే... మీకేమో లుంగీలూ సరిపోవడం లేదని రెండు తీసుకున్నాను .. కనీసం నా కోసం ఒక్క చీరన్నా కొనుక్కున్నానా ,ఆ విషయం అసలు అడిగారా మీరూ.. అంతేలేండి మీ వాళ్ళు అంటే పరిగెట్టుకుని అడగక పోయినా సరే అన్నీ చూస్తారు ఏటొచ్చీ మా వాళ్ళేకదా పై వాళ్ళూ ,,అక్కడ మాత్రం బాగా లెక్కలు అడుగుతారు ..వాళ్ళు మీకు ఎంత చేసినా అంతే .. (ఇంక కళ్ళ నీళ్ళు జర జర వచ్చేసేవి )..
నాన్న: అయ్యబాబోయి ఇప్పుడేమన్నానే బాబు ఈ నెల ఖర్చు విపరీతం గా ఉంది అందుకే అన్నాను సరేలే ఇస్తాను .. ఏంటో ప్రతి నెలా ఖర్చు పెరుగుతుందే కాని తగ్గడం లేదు ..


ఈ టైపు లో ఇంచుమించుగా ఇదే మాట్లాడుకోవడం విని విని మా నాన్న మీద విపరీతమైన జాలి వచ్చేసేది..అయ్యో పాపం ఎన్ని కష్టాలో కదా పైగా ఇంత మంది ఆడపిల్లలం ..మా చదువులు ,పెళ్ళీళ్ళు ఎలా చేస్తారో అనే భయం వల్లో మరొకటో తెలియదు కాని డబ్బులు అస్సలు ఖర్చు చేసేదాన్ని కాదు .. ఇంటికి చుట్టాలొచ్చినా, ఎవరన్నా ఏదన్నా కొనుక్కోమని డబులిచ్చినా అస్సలు ఖర్చుపెట్టేదాన్ని కాదు ..మిగిలిన వాళ్ళు అయిస్ క్రీములూ అని డ్రింకులని కొన్నా నేను అహనాపెళ్ళంట కోటా లాగా చూసి ఆనందపడిపోయేదాన్ని ,పైగా మనం మున్సిపల్ స్కూల్ విధ్యార్ధినులం కాబట్టి పుస్తకాల విషయం లో కూడా ఖర్చు చెప్పేదాన్ని కాదు ...అక్క, చెల్లెళ్ళ పుస్తకాల్లో మిగిలిన పేపర్స్ చింపేసి బైండింగు చేసుకుని మరీ రాసేదాన్ని కాని నాన్నను డబ్బులు అడిగేదాన్ని కాదు ...ఇవన్నీ కాక నాకు మరొక గొప్ప సులక్షణం ఉంది ... నేను దాచిన డబ్బులు నాకోసం కొనుక్కోను ..పెళ్ళికి ముందు మా నాన్నకి పెళ్ళయ్యాక మా ఆయనకు ఎవరికో ఒకరికి ఇస్తానుగాని నాకోసం కొనుక్కోబుద్ది కాదు ..ఇదేం అలవాటో నాకు అర్దం కాదు ...కాకపోతే వాళ్ళు ఆ డబ్బులను సద్వినియోగం చేయాలన్నమాట ..మొన్న ఎంతో కష్టపడి కూరలకిచ్చిన డబ్బులను కొంత దాచి ఒక 600 $ మా ఆయనకిస్తే ఎంచక్కా రాత్రికి ఒక క్రికెట్ బేట్ ,బాల్స్ చెత్త చెదారం కొనేసి వచ్చేసారు.. దెబ్బకి కుక్కలా ఏడ్చాను అదివేరే విషయం అనుకోండి..


సరే డబ్బు విషయం లో నేను ఇలా ఉంటే మా అక్క నాకు పక్కా వ్యతిరేఖం ...ఈ రోజంటే చిరంజీవి ప్రేమే లక్ష్యం ,సేవే మార్గం అంటున్నాడు గాని అది ఒక పదిహేనేళ్ళ ముందే ఈ స్లోగన్ ని బట్టీపట్టేసింది ... వాళ్ళ స్కూల్ లో ఎప్పుడూ రెడ్ క్రాసు ,బ్లూక్రాసు అని ఏంటో ,ఏంటో తెగ ఉండేవి ..అందులోనూ ఇది లీడర్ ఒకటీ .. దీనిపని ఏంటంటే ఎప్పుడూ డబ్బులు వసూల్ చేయడం అవి వాటికి జమ చేయడం .. ప్రొద్దున లేస్తే.. నాన్నా దానికి చారిటి ఇవ్వండి, దీనికి డబ్బులు ఇవ్వండి అని ఒకటే గొడవ.. ఇంట్లో ఎక్కడన్నా డబ్బులు దొరికాయంటే చాలు ఎవరివి ,ఏంటి అని అడిగేది కాదు తీసుకువెళ్ళీ వాటికి ఇచ్చేసేది .. దీని బాధ పడలేక నా డబ్బులు పిల్లి ముప్పై మూడు ఇళ్ళల్లో తన పిల్లలని దాచినట్లు నేనూ అలా దాచుకోవలసి వచ్చేది .. అంతటితో ఆగేదా ,విపరీతమైన దాన ధర్మాలు.. అమ్మ ఒకసారి షాప్ కి వెళ్ళి ఏదో కొనుక్కు రావే అని డబ్బులిచ్చి పంపితే దారిలో అడుక్కుంటున్న ముసలావిడకు ఇచ్చేసి వచ్చేసింది.. ఇంటికెవరన్నా వచ్చి అడుక్కుంటే వాళ్ళకు అన్నం పెట్టీ పంపేవరకూ ఊరుకునేది కాదు ..ఒక సారి ఇలాగే మండుటెండలో ఒక సోది చెప్పే అమ్మాయి చిన్నపిల్లను వేసుకుని వెళుతుంటే ..ఆవిడకు చిన్న పిల్లను అలా కష్ట పెట్టద్దు అని దారంతా బుద్దులు చెప్పి ఇంటికి తీసుకొచ్చి మరీ అన్నం పెట్టి పంపింది ..ఆవిడ వెళీపోతూ వెళిపోతూ రెండు జతల చెప్పులను కూడా తీసుకు పోయింది అక్కడ పెట్టినవి..(అంటే ఆ అమ్మాయి వచ్చేటప్పటికి ఉన్న చెప్పులు వెళ్ళగానే మాయం అయిపోయాయి ..వేరే చాన్స్ లేదు ...ఒకవేళ ఆమే కాక పోతే పాపం శమించు గాక )


సరే ఇవన్నీ ఒక ఎత్తు అయితే నాకు మరొక జలక్ ఇచ్చేది అడపాదడపా... రాత్రిళ్ళు పడుకునేటప్పుడు ఇలా చెప్పేది.. మెరుపు కలలు సినిమాలో కాజోల్ లాగా కన్నే మేరి మాతయో ఏదోనమ్మా అది అయిపోతాదట .. అలా అయిపోయి పేదలకు,దీనులకు సేవ చేస్తుందట..అందుకని ఆ సంవత్సరం కాంగానే బస్ ఎక్కి అక్కడెక్కడో ఏదో సేవాసదన్ ఉందిట అక్కడకు వెళ్ళి సేవ చేసి తరిస్తా అనేది ..ఇక చూస్కోండి నాకు అలా ఇలా భయం వేసేది కాదు .. అది కాదక్క సేవ ఇక్కడ నుండి కూడా చేయచ్చు కదే అంటే.. నన్ను పెద్ద అఙ్ఞానిని చూసినట్లు చూసి ఆగ్నస్ ఇలాగే అనుకుంటే మధర్ ధెరిసా అయిఉండేదా ..మంచిపనులు చేయాలంటే ఇంట్లో నుండి చేయలేం అని ఒక గంట క్లాసు పీకి అమ్మావాళ్ళకు ఇవేమి చెప్పద్దు వాళ్ళను నువ్వే చూసుకోవాలమ్మా అని రెండు పెద్ద పెద్ద డయిలాగులు చెప్పి ఎంచక్కా దున్నపోతు లా పడుకునేది.. ఇక నేను జాగారమే రోజూ ఇదెక్కడ వెళ్ళిపోతుందో అని రాత్రిళ్ళు పడుకునేదాన్ని కాదు ..పగలు పొద్దెక్కేవరకు లేవకుండా నానా తిట్లు తినేదాన్ని ....


మా అక్క అంటే మా ఇంట్లో అందరికీ మహా ఇష్టం ..నాన్నకు మరీనూ ...మీ అందరికన్న ముందు ఇదేరా నాన్న అని పిలిచింది అని తెగ మురిసిపోయేవారు.. అది ఆడింది ఆట ,పాడింది పాటలా ఉండేది.. పాపం ఆ పెద్ద కూతురు బిరుదువల్లే దాని చదువు మద్యలోనే అటక ఎక్కేసింది.. ఒక సారి మా తాతగారు (అమ్మ నాన్న) హడావుడిగా ఒక సంబంధం తీసుకు వచ్చారు .. అప్పుడే నా కూతురికి పెళ్ళి ఏంటి నేను చేయను అని మా నాన్న ... అదెలా కుదురుతుంది వెనకాలా ఇంకా ఉన్నారు.. మంచిది వచ్చినపుడు వదులుకోకూడదు ..అబ్బాయి కి బోలెడు ఆస్తి ,మంచి వ్యాపారం.. చదువు దేముంది .పిల్ల సంతొషం గా ఉండాలి గాని, మొన్న రెండోదాన్ని చూసే మా ఊర్లో నీకు ఇంత పెద్ద మనవరాలు ఉందా అని తెగ ఆక్చర్య పోయారు అని ఒకటే ఊదరకొట్టేసి పాపం మా నాన్నను హడలెత్తించేసారు.. ఇంకేంటి కట్ చేస్తే మా అక్క పెళ్ళీ ఘనం గా జరిగిపోయింది ...


మా ఇంట్లో అక్క పెళ్ళికి మేము పెట్టుకున్నంత బెంగ ఇంకే మిగిలిన ఆడపిల్లల మీద ఎవరూ పెట్టుకోలేదు... తాళి కడుతున్నపుడు ఇంక మీ ఇంటి ఆడపిల్ల వారి ఇంటి పిల్ల అయిపోయింది, ఇంటిపేరుతో సహా ఇక మీ ఇంటికి సంభందం తెగిపోయింది అని ఎవరో అనంగానే ...నాన్న బాధ ,మా బాధ వర్ణించలేము ... ఎన్ని రాత్రిళ్ళు పడుకోలేదో నేను అయితే ...అందరం ఒకే సమయాని అన్నం తినడం అలవాటేమో పొరపాటున దానికి కూడా అన్నం వడ్డించేసి కళ్ల నీళ్ళు పెట్టుకునే వాళ్ళం.. నాన్న సంగతి చెప్పనక్కరలేదు అంతా మీ నాన్న వల్లే .. నా కూతురిని నా నుండి వేరుచేసాడు అని అమ్మ మీద చూపించేసేవారు .. అందులోనూ అక్క వెళ్ళే ప్రతిసారి నాన్న!!అక్కడ ఎవ్వరూ నాకు తెలియదు.. ఉండలేకపోతున్నా ..నన్ను పంపకండి నాన్న ..చాలా దిగులేస్తుంది అనగానే.. పైకి.. అదేం లేదమ్మా ..అలవాటు అయిపోతుంది ..అమ్మ చూడు నీలాగే వచ్చేయలేదా అని సర్ది చెప్పి పంపి వెక్కి వెక్కి ఏడ్చెవారు .. పైగా అక్క కూడా చిన్నపిల్లఏమో అప్పటికి , దాని లెటెర్ అంతా నాన్న,నాన్న ఎప్పుడొస్తావ్ నన్ను మన ఇంటికి ఎప్పుడు తీసుకువెళతావ్ అని చాలా దిగాలుగా రాసేది ...


అయితే తరువాత తరువాతా మెల్లిగా అక్కడిపరిస్థితులు అలవాటు పడినా దాని మాటల్లో చెప్పినపుడు చాల బాధ అనిపించేది.. మా అక్క అత్తవారింట్లో మహా పొదుపు.. మహా అంటే మహా అన్నమాట :) ఇక్కడ అమ్మగారు పిల్టర్ నీళ్ళు తప్ప వేరే నీళ్ళతో మొహం కూడా కడిగేది కాదు ..అక్కడ తాగేది కూడా ఆకులు అలములూ పడిపోయి ఉన్న బావి నీళ్ళాయే .. అప్పటివరకూ డ్రెస్సులలో చిన్నపిల్లలా అటు ఇటు తిరిగే పిల్ల ఒక్క సారిగా బారెడు బారెడు చీరలు కట్టుకుని ఆరిందలా కుటుంభ బాధ్యతలు అన్నీ దానివే అయిపోయినట్లు వచ్చేవారికి ,వెళ్ళేవారికి మర్యాధలు పలకరింపులు ఇలా చాలా మార్పు వచ్చేసింది దానిలో ..


అయితే పెళ్ళి అయిన చాలానాళ్ళవరకు నేను వాళ్ళ ఇంటికి వెళ్ళలేదు ... మొన్నామద్య పట్టుబట్టీ వాళ్ళీంటికి తీసుకు వెళ్ళింది ..వాళ్ళ ఇంటి ముందే షాప్ చేసి చాల చక్కగా టక టక మంటూ అటు పనులు, ఇటు షాప్ చక్కబెట్టుకుంటున్న అక్కను చూసి మా అక్కేనా అని ఆక్చర్యపొయాను .. ఇల్లు చక్కగా పొందికగా పెట్టుకుంది అన్నీ చూస్తూ అక్కడ కృష్ణుని మెడలో వేసిన ఇత్తడి పూసల లా ఉన్న హారం చూసి ఇదేంటే ఇలా వెలిసిపోయిన హారం వేసావ్ అన్నాను.. అది చూసి అడక్కేబాబు ఏడుపు వరదగొదావరిలా పొంగుకొస్తుంది దాన్ని చూస్తే అంది .. ఏం అంటే.. ఆ మద్య ఒక సోది అమ్మాయి వచ్చీ వద్దు మొర్రో అని అంటున్నా మొహమాట పెట్టేసి సోది చెప్పిందంట ,దాని సారం ఏంటంటే దీని ఇంటికి సిరి రాబోతుంది అంట ..కాని గ్రహబలం వల్ల ఇది వాటిని అందుకోలేకపోతుంది అంట అని ఏదో ఏదో చెప్పింది అంట ....అంతకు ముందు మా బావా ఏదో క్రికెట్ మేచ్ విషయం లో బెట్ కాయాబోతే ఎందుకులే మనకు అని ఇది బలవంతం గా ఆపేస్తే చాలా మొత్తంలో లాభం ఆగిపోయిందంట .. ఇలా రెండు,మూడు జరిగాయి అంట ... అయితే మా అక్క ఇదంతా సోదిలే యాదృచ్చికం అని కొట్టి పడేసి మర్చిపోయిందంట కాని ఆ రోజునుండి ఒకటే కలలు ఇంటినిండా బంగారం ,బంగారం ....నన్ను కాదనకు అని... ఇదేంటా ఇలా వస్తున్నాయి అని అనుకున్నాకా.. ఒక నొక ముహుర్తాన ఒక అతను వచ్చీ ఏమండీ మీవారు ఉన్నారా అని అడిగి బయటకు వెళ్ళారని తెలుసుకున్నాక తెగ బాధ పడి ..మా ఇంట్లో తరతరాల నుండి ఉన్న కొన్ని నగలున్నాయండి ...ప్రస్థుతానికి చాలా ఆర్ధిక ఇబ్బందుల్లో ఉన్నాం ..కాబట్టి వాటిని అమ్మకానికి తీసుకు వచ్చాను ... బయట అమ్మజూపితే పురాతన నగలు కాబట్టి నన్ను అనుమానించే అవకాశం ఉంది అని ఇంకేంటో ఏంటో చెప్పి ఇది ఆకు రాయి దీని మీద గీటు పెడితే బంగారమో కాదో తెలిసిపోతుంది అని మా అప్పలమ్మకు మరి ఏ విధం గా చెప్పాడో తెలియదు మొత్తానికి నమ్మించేసేడు.. ఇది వాళ్ళయనకు పోన్ చేసి చెప్పిందంట .. అసలే మా బావ గారు ఇలాంటి విషయాల్లో చాలా ఆలోచిస్తారు.. వద్దు వద్దు అని చెప్పినా మా అక్కకి ఆ సోది ఆవిడ,కలలు , సూచనలు అన్ని గుర్తు వచ్చేసి ..అమ్మ బాబోయి మనం చాలా నష్ట పోతాం ఇది తీసుకోకపోతే,.. లేకపోతే విచిత్రం కాక పొతే ఇన్ని సూచనలా అని వినకుండా ఒక పదివేలు ఇచ్చి ఒక హారం తీసుకుంది అంట ..వాడు వెళ్ళేవరకూ చేతిలో తళ తళా మెరుస్తుంది అంటా అలా వెళ్ళగానే ఇంకేంటి ...అంతా విష్ణు మాయ అయిపోయింది ...


అంతా విని నేను నోరు వెళ్ళబెట్టి అలా ఉండిపోయాను..అక్కా నువ్వు నువ్వేనా... మూఢనమ్మకాలను ఖండ ఖండాలుగా ఖండించిపారేసే నువ్వా ఈ పని చేసింది .. డబ్బు కంటే సేవా,ప్రేమా,దయ ,కరుణ ,కారం,ఉప్పు,చింతపండు ముఖ్యమని క్లాసుపీకే నువ్వా ఈ పని చేసింది ,అని బోలెడు ఆక్చర్య పోతుంటే ... అలా మళ్ళీ మళ్ళీ గుర్తుచేయకే బాబు.. టైమే టైము ... ఇదే ఇంకొకరికి జరిగితే నీకంటే ఘాటుగా వాళ్ళను తిట్టిపడేసేదాన్నీ.. ఇలా ఎలా చేసారు అని తెగ ఆక్చర్యపడిపోయేదాన్ని ... ఇంకా నయం ఎప్పుడూ ఇంట్లో వ్యాపార పని మీద ఒక యాబై వేలు తక్కువ కాకుండ ఇంట్లో పెట్టేవారు ఆయన ..ఆ రోజు నా అదృష్టం.. తక్కువే ఉన్నాయి.. అమ్మో, మా ఇంటి ఎదురుగా ఉన్న గుడి అమ్మవార్లే కాపాడారు .. లేకపోతే అదెవరో నాకేదో చెప్పడమేమిటీ,నాకు కలలు రావడం ఏమిటీ ,నేను ముందు వెనుకలు ఆలోచించకపోవడం ఏమిటీ ...అయినా ఇంత స్వార్ధం నాకు ఎక్కడినుండి వచ్చిందో ..లేక వాడి మాటల గారడీనో ..మొత్తానికి ఇదీ కధ .. హుం అందుకే మళ్ళీ ఇలాంటి పనులు చేయకుండా ఎదురుగా పెట్టుకుని ఈ గొలుసు మరీ జాగ్రత్తగా ఉంటున్నా అంది...


కాలమహిమనా లేక పెళ్ళి తరువాత బాధ్యతల పేరుతో వచ్చే స్వార్ధమా మరేంటో కాని అలాంటి కన్‌ఫ్యూజ్ పరిస్థితి మాత్రం నాకు జరగకుండా చూడు స్వామి అని దణ్ణం పెట్టేసుకున్నా .. అసలే నేను పొదుపు మరి ...( మీరు వేరే అర్ధాలు తీయకండి మరి .. అది కేవలం పొదుపుమాత్రమే ..మీరు నమ్మాలి )

కాలేజి ప్రేమలు ( రెండో భాగం)

ఎప్పుడైతే వాడు నావైపుకు తిరిగాడో ఓరి దేవుడోయ్ అనుకుని నేను సువర్ణ వెనకాతలకు వెళ్ళిపోయాను ,వాడి ఫ్రెండ్స్ నా భయాన్ని చూడగానే హి.హి..హి అని ముప్పై ఆరు పళ్ళూ బయట పెట్టి నవ్వారు,మరీ ఎక్కువ నటించేయకు నువ్వు అని నన్ను అని మళ్ళీ దాన్నీ బ్రతిమాలడటం మొదలెట్టాడు..నాకు అంత ఉక్రోషం,కోపం లోనూ వాడు గబుక్కున గుర్తు వచ్చేసాడు..


వాడు బాబ్జీ గాడు ,నా 5వ తరగతిలో నా క్లాస్ మేట్ ,చిన్నపుడు తెల్లగా బూరె బుగ్గలేసుకుని క్లాసులో వెనుక బెంచీలో ఎవ్వరితో మాట్లాడకుండా ఒక బుక్ ముందేసుకుని ఒక్కడే కూర్చునేవాడు..వాడు నిజంగా చదువుతున్నాడో మరి కళ్ళు తెరిచే నిద్రపోయేవాడో తెలియదుగాని మా తెలుగు మేస్టారుకి మాత్రం మహా ఇష్టం వాడంటే ...ఎందుకో నాకూ తెలియదు.. వాడురా నిజమైన విధ్యార్ది అంటే ,నేటి బాలలే రేపటి పౌరులు ,వీడిలాంటి పౌరులే దేశానికి వెన్నుముక ,గాడిదగుడ్డు..కంకరపాసు అని రోజూ వాడిని పొగడకుండా ఉండేవారు కాదు,బాబ్జీ ఇల్లు మా ఇంటి దారిలోనే కాబట్టి తరచూ చూస్తునేదాన్ని ,తరువాత నేను స్కూల్ మారాకా మద్య మద్య లో కనబడేవాడు..మళ్ళీ ఇన్నాళ్ళకు ..మనిషి ఏ మాత్రం గుర్తుపట్టకుందా పొడవు ,లావు పైగా చేతులకు నాలుగు ఉంగరాలు, మెడలో గొలుసు ఒక హీరో హోండా ..ఎలాంటి బాబ్జీ ఎలా అయిపోయాడు.. ఇప్పుడు గనుక మా తెలుగు మాస్టారు చూస్తే ఏమయిపోయేవారో అనిపించింది ..


వీదిలో మా వాళ్ళేమైనా వస్తున్నారేమో అని అటు ఇటు చూస్తూ నడుస్తున్నా ...ఇదిగో గుర్తుంది కదా 29 ,బాగా గుర్తు పెట్టుకో నేను మాట మీద నిలబడే మనిషిని అని ఒకటికి రెండు సార్లు అని దాని చేతిలో లెటెర్ పెట్టి మరీ వెళ్ళిపోయాడు ,వాడు వెళ్ళాక హమ్మయ అని ఊపిరి పీల్చుకుని ఏమే వాడు బాబ్జీ గాడు కదా అన్నాను ..నీకెలా తెలుసు అంది .. వీడితోనె చదివి ఏడ్చానులే చిన్నపుడు,నీకెలా తెలుసు ఇంతకీ అన్నాను ..మాటల్లోనే వాళ్ళింటికొచ్చేసాం ..


నాకో ఫ్రెండు ఉందిలే లలిత అని ,దానికి వాసూ అని బోయ్ ఫ్రెండ్ ఉన్నాడు. వాడికి వీడు ఫ్రెండు ,అయితే మా ఇద్దరికీ ఇంకో ఫ్రెండు ఉంది ఆ అమ్మాయిని వీడి ఫ్రెండ్ ఏడిపిస్తుంటే నేను వాడితో గొడవపడ్డాను.. అప్పుడు వీడు వాడి వైపూ నేను ఆ అమ్మాయి వైపూ వెళ్ళి తిట్టుకున్నాం ..అప్పటి నుండి నా మీద కక్ష్య గట్టీ ఇలా ఏడిపిస్తున్నాడు అంది (ఇప్పుడు మీకు ఎంత అర్దం అయిందో నాకూ అంతే అర్దం అయింది అప్పుడు)నాకు చిరాకొచ్చింది ,అయినా నీకు పనీ పాట ఏమీ ఉండదా అందరి విషయాల్లోకి వెళతావ్ ,ఎవరు ఎవరిని ఏడిపిస్తే నీకేంటి,ఇప్పటికే నీ గురించి ఎంత బేడ్ గా చెపుతున్నారో తెలుసా ఈ అబ్బాయిలు బయట అన్నాను ..


అది నా వైపు కోపం గా చూసింది ,రేపు నిన్నెవరన్నా ఏదన్నా అంటే ..నేను నీకులా నాకెందుకు అని ఊరుకోను ,ఫ్రెండ్స్ అన్నాకా కాస్తా వేల్యూ ఇవ్వాలి ,అడ్డమైనోళ్ళకీ భయపడాల్సినపనిలేదు అంది... నాకు మనసులో గుచ్చుకుంది కొంచెం ..దొంగవెదవ యే ఫ్రెండ్ దగ్గరో బెట్ కాసి ఉంటాడు నన్ను పడేస్తానని అందుకని ఇలా చంపుతున్నాడు ,వాళ్ళ నాన్న సారా కాంట్రాక్టర్ లే ,అందుకే కొవ్వు పట్టి ఏడుస్తున్నాడు ,చూసావా పోలీసులన్నా లెక్క లేనట్లు ఎలా మాట్లాడుతున్నాడో అంది . ..ఏడ్చాడులే నిన్ను భయపెడదామని ..వంటి మీద ఆడపిల్లలా ఆ బంగారం చూసావా ..వీడు సామాన్యుడు కాదే బాబు ..అవి చూసి ప్రేమించేస్తారనుకున్నట్లున్నాడు .. . అన్నాను ,


ఈ లోపల అది లెటెర్ ఓపెన్ చేసింది మొత్తం అలికేసినట్లు ముద్దగా ఉంది ఏమి అర్దం కావడం లేదు ... ఎందుకే ఇలాంటివన్నీ రాస్తారు ,కనీసం రాసిందేంటొ అర్దం కాకుండా అన్నాను ,వాడి మొహం ఇంకు తో రాసింది మాత్రం అర్దం అయి చచ్చిందనుకున్నావా.. ఉండు చూపిస్తా ఎందుకైనా మంచిదని కొన్ని దాచా అని ఒక లెటెర్ తెచ్చి ఇచ్చింది .. రెండు లైన్లు చదివేసరికి నాకు అరగంట పట్టింది.. నాకు మళ్ళీ మా తెలుగు మాస్టార్ గుర్తు వచ్చారు... వీడి కంటే వీడు ఇచ్చిన లెటెర్స్ భరించలేకపోతున్నానే బాబు,అవి చదువుతుంటే ఒక్కో సారి నా మీద నాకే జాలేస్తుంది అంది.. నేను పడి పడి నవ్వా ..



ఉన్నట్లుండి ఏమై చచ్చిందో రక్తం తో మొదలెట్టాడు.. నేను ఒప్పుకునే వరకూ బ్లెడ్ తోనే రాస్తాడంట ,ఆ చేతి మీద ఆ ప్లాస్టర్లు చూసావా ,వీడికేమైనా అయితే నాకు చుట్టుకుంటుంది అంది దిగులుగా .. వాడి మొహం ,నమ్మేస్తున్నావా.. రోజు యే కోడి నో మేకనో వేసేస్తున్నట్లున్నాడు .. ఏం కాదులే అన్నాను... అది కాదే ఈ నెల 29 వరకూ చూస్తాడంట ఆ రోజు ఒప్పుకోకపోతే చస్తా అని బెదిరిస్తున్నాడు ,పైగా నేనే కారణం అని చెబుతాడంట అంది ...ఈ సారి దానితో పాటు నాకు భయం వేసింది ,యే ఫ్రెండ్ ప్రోద్భలం తో అన్నా అలా చేయడానికి ట్రై చేస్తే అని, కాని బయటకు చెప్పకుండా ..ఇలాంటి సినిమా కధలు చాలా చూసాం .. నమ్మకే ,అంతా ఒట్టిదే భయపెట్టడానికి అన్నాను.. మాములుగా అయితే భయ పడేదాన్ని కాదు మా అక్క పెళ్ళి కుదిరింది కదా ,వీడి బెదిరింపులు చూస్తుంటే ఒక్కోసారి భయం వేస్తుంది ,మాటంటే మాటే ..నా సంగతి నీకు తెలియదు నేను మహా మూర్ఖుడిని అని హింసపెట్టేస్తున్నాడు, చెప్పుకోడానికి కూడా ఎవరూ లేరు .. అక్క పెళ్ళి ఎలాగు అమ్మమ్మ ఇంటి దగ్గర కదా అక్కడకు వెళ్ళిపోయింది అంది దిగులుగా ..


పోనీ ఇలాంటివి ఎంత కాలం దాస్తావ్ ,మీ అమ్మగారికి చెప్పేసేయి ఎందుకైనా మంచిది అన్నాను... ఎక్కడే తను ఇంటికొచ్చేసరికే రాత్రి అయిపోతుంది ,పైగా ఒక్కరే పెళ్ళి పనులు చూసుకోవాలి..ఇప్పుడు ఇలాంటివి చెపితే ఏమన్నా ఉందా అంది.. సరే కంగారుపడకు ఏం కాదులే కొన్నాళ్ళు తిరిగి వాడే పోతాడులే అనేసి ఇంటికి వచ్చేసాను ..కాని నాకు దానికంటే ఎక్కువ భయం పట్టుకుంది .. అలా చేస్తాడేమో ,ఇలా చేస్తాడేమో అని ఒకటే ఆలోచనలు ...అందులోనూ ఫ్రెండ్స్ కి వేల్యూ ఇవ్వాలే అని అది అన్నమాటలొకటి గుచ్చుకునేవి పోనీ నాన్నకు చెపితే వాడి పని నాన్న చెబుతారు ,చిన్నపుడు ఒకసారి ట్రైన్ లో ఒక అమ్మాయిని ఎవరో అబ్బాయి ఏడిపిస్తే వాడి వీపు చెళ్ళూమనిపించారు ,అప్పటి నుండి నాన్న నాకు హీరో లా కనబడేవారు..కాని ఇప్పుడు ఏమని చెప్పను?? ఇది అడ్డమైన గోడవల్లో ఈ సమస్య తెచ్చుకుందని చెబితే ముందు నన్ను తిడతారు ఇలా సాగిపోయేవి నా ఆలోచనలు ..


రోజూ కాలేజ్ కి వచ్చినపుడు దాన్ని అడిగేదాన్ని ఇంకా ఏడిపిస్తున్నాడా ,ఇంకా లెటెర్స్ ఇస్తున్నాడా అని ..చివరకు 29 వచ్చేసింది ఆ రోజు అది కాలేజ్ కి రాలేదు .. ఆ మరుసటి రోజుకూడా .. ఇంక చూసుకోండీ నాకు టెన్షన్ .. వాడి బాధ పడలేక మానేసిందా లేక నిజం గా ఏదన్నా చేసుకున్నాడా వాడు ..ఉండబట్టలేక మరుసటి రోజు వాళ్ళింటికి వెళ్ళాను .. నేను వెళ్ళేసరికి ఫుల్ల్ జ్వరం తో ఉంది ....ఎవరూ లేరు ఇంట్లో .. నన్ను చూడగానే వాడికి ఇష్టం అని చెప్పేసానే అంది ఏడుస్తూ ,అదేంటే ఎందుకు అలా చెప్పావ్ అన్నాను సగం అర్దం అయి కానట్టు ఉంది ... 29 న బ్లేడ్ పట్టుకుని మరీ వచ్చాడంట చెప్పకపోతే ఇక్కడే నరం కోసేసుకుంటా అని,ఒకవేళ ఫ్రెండ్ ఎవరితో అన్న బెట్ కాసేడేమో చెబితే పీడా పోతుంది అని ఒప్పేసుకుంది అంట ... ఇంక అక్కడి నుండి పెళ్ళెపుడు ,లేచిపోదామా అని ఇంటి చుట్టూ అరుస్తూ తిరుగుతున్నాడంట ,వీదిలో వాళ్ళందరూ ఏమనుకుంటారే అంది ..నాకేం చెప్పాలో అర్దం కాలేదు.. మా నాన్నగారికి చెపుతా భయపడకు.. వాడిని బాగా తంతారు అని ఎదో ధైర్యం చెబుతున్నా గాని ఇవన్నీ జరగని పనులని తెలుసు ...


అది కళ్ళు తుడుచుకుని నేను ఇంక కాలేజ్ కి రానే మా అక్క పెళ్ళి అయ్యేవరకు,ఆ తరువాత చెప్తా వాడి పని,నేనే చంపేస్తా వాడిని అని కసేపు అంటుంది కసేపు దిగాలుగా అయిపోతుంది ... సరిగ్గా అప్పుడు వచ్చారు వాళ్ళ అమ్మమ్మ గారు .. దీని ఏడుపు చూడగానే ఏమైంది అని కంగారుగా అడిగారు.. నేను,అది ఒకదానికి ఒకటి సంభందం లేకుండా మాట్లాడేసి సర్ది చెపుతున్నాం,అవిడ నమ్మీనమ్మనట్లు చూస్తుంది .. నాకెందుకొచ్చిందో ధైర్యం ఉన్నట్లు ఉండి ..ఇలా నానిస్తే పెద్ద గొడవలు అయిపోతాయేమో అనిపించింది అసలే ఎదర పెళ్ళి ఒకటి ఉంది బోలెడు అప్పులు చేసారు పైగా.. అందుకే కొన్ని కొన్ని కట్ చేసి వాడు ఏడిపించడం ,పెళ్ళి చేసుకుంటా అని వేదించడం వరకూ చెప్పేసాను..


అంతా విని ఆమె నాకులా ఆవేశపడిపోలేదూ ,దాన్ని తిట్టనూలేదూ .. ఏం చేస్తున్నాడు లెటెర్స్ ఏమన్నా ఉన్నాయా లాంటివి అడిగీ వాళ్ళ ఇల్లు చూపిస్తావా అమ్మా అని అడిగారు,ఒక పక్క మా ఇంట్లో తెలిస్తే అని భయం గా ఉన్నా ఆ మాత్రం కష్టం లో ఫ్రెండ్ ని ఆదుకోపోతే ఎలా అని సరే అండి అన్నాను .. దారంతా ఆలోచనలే ఈవిడ మాటలు వాళ్ళు లెక్క చేస్తారా,వాళ్ళు గాని ఇలా అంటే మేము అలా అనాలి ..వాడు రాసిన లెటెర్స్ చూపించాలి ,బెదరకూడదు,తడబడ కూడదు ,తప్పు వాడిదే అని తేల్చి మళ్ళీ వెనుక పడకుండా చూడాలి ఇలా యమా సీరియస్సుగా ఆలోచిస్తున్న నాకు ఆ పసుపు రంగు చీర కు పచ్చ బోర్డర్ ఉంటే ఎంత బాగుంటుందో ,ఆవిడ ఎరుపు రంగు వేసుకుంది అన్న మాటలకు ఈ లోకం లో వచ్చాను .. నాకు ఇదివరకు పోచంపల్లి లో అలాంటి డిజైన్ ఉండేది.. ఆ పారిజాతం పూల చెట్టు ఉన్న ఇల్లు చూసావా ఆవిడకు ఎంత గోరోజనం అనుకున్నావ్ పూలన్నీ నేల పాలు చేస్తుంది గాని బయట వాళ్ళకు ఒక్క పువ్వు ఇవ్వదు , ఇక్కడంటే పూలకు కరువు గాని మా ఊర్లో పారిజాతలు,సన్నజాజులు,కనకాంబరాలు,మందారాలు,నిత్యమల్లులు లేని ఇల్లు ఇల్లుకాదనుకో ....అంటూ పెళ్ళికో ,పేరాంటానికో వెళుతున్నంత కూల్ గా వస్తున్న ఆవిడను చూసి నాకు మాట రాలేదు ...దారంతా ఇదే సోది ..


చివరకు వాళ్ళింటి కొచ్చాం ... ఇల్లు పెద్దదే ..ఉయ్యాల బల్ల కూడా పెద్దది బాగుంది అన్నారు లోపలికి వస్తూ .. ఈ లోపల బాబ్జి వాళ్ళ అమ్మగారు బయటకు వచ్చారు.. ఈవిడ పలాన పలాన అని పరిచయం చేసుకున్నారు.. ఆవిడ ఏమనుకుందో లోపలికి రండి అంది పిలాలా, మానాల అన్నట్లు..లోపలికి వచ్చాకా మమ్మల్ని చూడగానే బాబ్జిగాడి గుండెల్లో కిలో రాయి పడిపోయింది ..నాకు వాడి మొహం లో భయం చూడగానే ఎక్కడ లేని ధైర్యం వచ్చేసింది..ఆవిడకు మాత్రమే వినిపించేలా వాడే వాడే అన్నాను.. అదిగో అబ్బాయి కూడా వచ్చేసాడు .. ఏమీ లేదమ్మా మీ అబ్బాయికి మా మనవరాలు నచ్చిందంటా ,రోజూ ఇదిగో రక్తం తో కూడా లెటెర్స్ రాసి ఇస్తున్నాడు.. చూసావా ఆ చేతినిండా ఆ ప్లాస్టర్స్ ..నిన్న చేయి కూడా కోసుకోబోయాడంట ..చివరకు మా పిల్ల ఆపింది కాని ఏమయ్యి ఉండేది ఆవిడ అదే కూల్ గా మాట్లాడుతుంది ...


బాబ్జి వాళ్ళ అమ్మ ఏం మాట్లాడాలో తెలియక ఏమ్రా ,నిజమా అని నిలదీసింది ...దాని సంగతి నీకు తెలియదమ్మా..దానికి నేను అంటే ఇష్టం వాడేదో అర్దం పర్దం లేకుండా పొగరుగా మాట్లాడుతున్నాడు..పోనీలేమ్మా అబ్బాయిని అనడానికేముంది ఈ కాలం పిల్లలందరూ అలాగే ఉన్నారు.. చివరకు మా పిల్ల కూడా ఇష్టపడింది అని చెపుతున్నాడు కదా.. మా పెద్ద మనవరాలి పెళ్ళి కుదిరిందీ ,పిల్లలు ఎలాగూ ఇష్టపడుతున్నారుగా మాకు కుల పట్టింపు పెద్దగా లేదు జాతకం ఇస్తే ఒకేసారి ముహర్తం పెట్టించేస్తాము ...ఖర్చులో ఖర్చు ... పెళ్ళయ్యాక చదువుకుంటారు తప్పేముంది తేలిగ్గా అనేసింది ఆవిడ ...నాకు సౌండ్లేదు ..అటు బాబ్జి వాళ్ళమ్మ ఏం మాట్లాడుతున్నారు మీరు, మీ వయసుకు మర్యాద ఇస్తుంటే... ఆయన్ని పిలిపిస్తాను ,విషయం తేల్చెస్తారు అని ఫోన్ తీసి ఫైటింగ్ మొదలు పెట్టేసింది .. నేను చల్లగా వచ్చేసాను అక్కడినుండి..


ఆ తరువాత ఏమైందో ఏంటో నాకు తెలియదు మళ్ళీ సోమవారం కాలేజ్ కి వెళ్ళాక సువర్ణను అడిగాను ఏంటే ఆవిడ పెళ్ళి కుదిర్చేసారా అని.. ఏం పెళ్ళీ అంటుంది తెల్లబోయి.. మొన్న ఇలా జరిగింది అంటే... అవునా, మాకేం చెప్పలేదే ,వెళ్ళి వాళ్ళకు విషయం చెప్పి వచ్చాను అన్నారు అంతే అంది ...నాకిప్పటికీ మిస్టరీయే అక్కడేం జరిగిందో అని,ఒక వేళ వాళ్ళను భయపెట్టడానికి అలా అన్నారో,లేక ఎలాగో కలిగిన కుటుంభం కదా పెళ్ళి కుదిర్చేద్దాం అనుకున్నారో ,అసలేం జరిగిందో ,ఏమో కాని ఆ తరువాత బాబ్జీ గాడు లేడు వాడి బేచ్ లేదు వాడి హోండా బండిలేదు..

కాలేజి ప్రేమలు

చిన్నపుడు ఒక కోరిక ఉండేది ...సినిమాల్లో హీరోయిన్ లాగా క్లాస్ రూంలో లెక్చరర్ పాఠాలు చెబుతుంటే, నేను డెస్క్ మీద సీరియస్సుగా బుక్ పెట్టి అవన్నీ వినేసి రాసేస్తుంటే ,మా అమ్మ కిటికీలోంచి చూస్తూ మా అమ్మాయి ఎంత బాగా చదివేస్తున్నాదో అని తెగ ఆనందభాష్పాలు కార్చేస్తుంటే చూడాలని(ఇక్కడ వెంకీ గుర్తొస్తే నా తప్పు కాదు ) .. అమ్మ కాలేజ్ కి వచ్చి మనల్ని చూసే అంత సీన్ ఉండదని తెలుసు కాని అదోసరదా...


తను చిన్నపుడు చదువుకోవాలని తెగ సరదా పడేది కాని మా తాతయ్య ఎంత చాదస్తం అంటే ఆయనకు 3 కూతుర్లు ఉన్నారన్న విషయం చాలా మందికి తెలియనే తెలియదట,నా చిన్నపుడు శెలవలకి వాళ్ళింటికి వెళ్ళేటప్పుడు చూసేదాన్ని ...మా ఆఖరి పిన్ని కి ఇంట్లోనే ఒక 80 యేళ్ళ ముసలి పంతులుగారిని ఇంటికి పిలిపించి చదువు చెప్పించేవారు .. ఆయన చెప్పేది తనకి అర్దం అయ్యేది కాదు తను చెప్పేది ఆయనకు వినబడేది కాదు ...కనీసం సంవత్సరానికి 2 మాస్టార్లు మారేవారు.. వయసు అయిపోవడం వల్ల టపా కట్టి.. అలాంటి ఇంట్లో నుండి రావడం వల్లో ఏమో ,అమ్మ మేము బాగా చదువుకోవాలని అనుకునేది ..


ఆ కారణం చేత కాలేజ్ మా ఇంటికి కాస్త దూరం అయినా సరే (అంటే 40 నిమిషాలు నడక ) పట్టుబట్టి జాయిన్ చేసింది.. అది కూడా అమ్మాయిల కాలేజే అనుకోండి.. మా కాలేజ్ ఎంత బాగుండేదంటే ఏదో పార్క్ లో ఉన్నట్లే ..ఎటు చూసినా పచ్చని చెట్ట్లు ,ఎర్రని పూలు ,నేరేడు,బొప్పాయి జామా ,సెంటుమల్లి ,మెత్తని పచ్చిక అబ్బా అందులోనూ కాలేజ్ ఓపెన్ చేయగానే వర్షాలు ఒకటి స్టార్ట్ అవుతాయేమో వర్షంలో తడిచి ఫ్రెష్ గా స్నానం చేసి వచ్చిన ప్రకృతికాంతలా భలేగుండేది .. అప్పటి వరకు బుల్లి బుల్లి స్కూల్స్ లో చదివిన నాకు అదో అందమైన లోకం లో ఉన్నట్లు అనిపించేది.. యూనీఫాం లు ,రెండు జడలు ,స్కూల్ బేగ్ లు గట్రా పోయి స్టైల్ గా రెండు పుస్తకాలు, రంగు రంగుల డ్రెస్లు ,వదులుగా అల్లిన జడ ,నుదిటి మీద రింగులు తిరిగిన ముంగురులు ( అంటే నేను అలా పీక్కునేదాన్ని లెండి) అలా హీరోయిన్లా ఫీల్ అయిపోయేదాన్ని ..


ఇంక జాయిన్ అయ్యాకా నా కల తీరే రోజు వచ్చేసింది కాబట్టి అవసరం ఉన్నా లేక పోయినా సార్ ఏం చెప్పినా చెప్పకపోయినా తెగ రాసేసేదాన్ని బుక్ లో ..ఇక్కడ నాకు విపరీతం గా నచ్చేసిన విషయం లెక్చరర్లు మమ్మల్ని 'ఏమండీ,' మీరూ అని సంబోధించడం.. అప్పటి వరకూ ఏయ్, అమ్మాయ్ దీనికి సమాధానం చెప్పు అని అనే టీచర్లు పోయి ,మీరు చెప్పగలరా దీనికి సమాధానం అని ఎంతో వినయంగా అడిగే సార్ లను చూస్తుంటే తెగ ముచ్చట వేసేది...ఇంకా నచ్చిన విషయం ఏంటంటే ఎలెక్షన్లు ... మా కాలేజ్ ఇంటెర్ ,డిగ్రీ కలిపి ఉండేది, కాబట్టి డిగ్రీ అమ్మాయిలు ప్రెసిడెంట్ గా ,సెక్రట్రీ గా ఇలా పోటి చేసే అమ్మాయిలందరూ మంచి మంచి చీరలు కట్టుకుని బొమ్మల్లా తయారయి నాకు ఓటెయ్యండమ్మా ప్లీజ్,ప్లీజ్ మా మంచి చెల్లాయిలు కదూ అని అభ్యర్దిస్తుంటే మనిషికి ఒక్క ఓటు హక్కు ఎందుకుంది ఒక 5,6 ఉండచ్చుకదా అనిపించేసేది..


ఆ తరువాత మెల్లి మెల్లిగా నాకు కొత్త ఫ్రెండ్స్ పరిచయం అవ్వడం మొదలైంది.. ముఖ్యం గా హాస్టల్ అమ్మాయిలు .. పక్కన ఉన్న పల్లెటూర్లనుండి వచ్చి కాలేజ్ హాస్టల్ లో చదివేవారు.. వాళ్ళకు నేను వేసుకున్న డ్రెస్లంటే మహా ఇష్టం .. మా అక్క చెల్లెళ్ళు అందరం ఇంచుమించుగా ఒకటే పొడవు అవ్వడం వల్ల ఒకరి డ్రెస్స్ లు ఒకరం వేసేసుకునేవాళ్ళం... ఇది నీది ఇది నాది అని ఉండేది కాదు అందుకే రోజుకో డ్రెస్స్ తో తెగ పోజులు కొట్టేసేదాన్ని .. అప్పుడప్పుడూ హాస్టల్ అమ్మాయిలకు నా డ్రెస్లు ఇచ్చేదాన్ని..ఇంట్లో అనుమానం వస్తే మా అక్క ఉందిగా నాకు అమాయకం గా ..దాని మీద తోసేసేదాన్ని ..మొన్న వేసుకుంది ఎక్కడ పెట్టేసిందో అని ...


కాలేజ్ దూరం అవ్వడం వల్ల అమ్మ బాక్స్ పెట్టేది ... నాలా బాక్స్ తెచ్చుకున్న వాళ్ళందరితో కలిసి తినేవాళ్ళం ..వండుకున్నమ్మకు ఒకటే కూర అన్న చందాన భలే ఎంజోయ్ చేస్తూ తినే వాళ్ళం.. అదిగో సరిగ్గా అప్పుడు పరిచయం అయింది సువర్ణ ..సువర్ణ మొదటి నుండి నాకు ప్రత్యేకం గా అనిపించేది , తను పైకి చాలా మొండిలా కనిపిస్తుంది గాని మహా సున్నితం ... పొగరుగా మాట్లాడినట్లు అనిపిస్తుంది కాని ఎవరికైన కొంచెం బాధ కలిగినా తట్టుకోలేదు .. ఒక సారి ఎవరో అమ్మాయి మనీ పోగొట్టుకుని ఏడుస్తుంటే తను ఫీజ్ కోసం తెచ్చిన డబ్బు ఇచ్చేసింది .. నిజానికి తనది కలిగిన కుటుంభం కాదు .. మరీ అంత ఎక్కువ చేయకూడదు ముందు నీ సంగతి చూసుకో అని మందలించేదాన్ని నేను ...

అయితే ఎంత ఫ్రెండ్ అయినప్పటికీ ఇంటికి వెళ్ళేటప్పుడు తనతో కలిసి వెళ్ళాలంటే కాస్త భయం గా ఉండేది ..సువర్ణది ఒక విలక్షణమైన మనస్థత్వం ..ఎంత సున్నితమైనది అయినప్పటికీ అబ్బాయిల విషయం వచ్చేసరికి అపర కాళి అయిపోయేది .. మేము కాలేజ్ కి వచ్చేదారిలో చాలా మంది అబ్బాయిలు కాచుకుని ఉండేవారు వచ్చేపోయే అమ్మాయిలను ఏదో ఒకటి అంటూ .. కొంతమంది గులాభీలు ,చేమంతులు అని పొగిడితే ఇంకొందరు కాస్త తిండి తగ్గించుతల్లీ నీ కట్నం కూడపెట్టే చాన్స్ మీ నాన్నకు ఇవ్వు అని వెటకారం చెసేవారు.. వీరి మాటలకు ముసి ముసి నవ్వులు నవ్వుకుని కొందరు వెళ్ళిపోయేవారు ఇంకొంతమంది విన్నా విననట్లుగా పట్టించుకోకుండా వెళ్ళిపోయేవారు ఇంకొందరు .. ( నేను ఈ కోవలోకొస్తా అన్నమాట) , అయితే సువర్ణ అందరిలా ఊరుకునేది కాదు ... అసలు తననే కాదు ఇంకొకరిని అన్నా సహించేది కాదు .. మాటవరసకు నువ్వు మందారం లా ఉన్నావు అని ఎవరన్నా అన్నారనుకోండి .. నువ్వు మాత్రం ముళ్ళపందిలా ఉన్నావ్ .. నీకెందుకురా నేను ఎలా ఉంటే అని గొడవకు దిగేది ..ఒక వేళ పక్క వాళ్ళను అంటే ,అదెలా ఉంటే నీకెందుకురా ముందు నీ మొహం అద్దం లో చూసుకో అని తగవు పెట్టుకునేది ..


పోని ఇంతా చేసి పురుష ద్వేషిణి యా అంటే అదీ కాదు... ప్రేమికులు ఎవరన్నా విడిపోతే వాళ్ళకు బుద్దులు చెప్పి మరీ కలిపేది ... నీకెందుకే ఇవన్నీ అంటే కయ్యిమనేది .. నీలాంటి వాళ్ళవల్లే దేశం పాడైపోతుంది అన్నీ మనకెందుకు అనుకుంటావ్ అని తిట్టి పడేసేది ...
అయితే ఈ రకమైన మనస్థత్వానికి కారణం కొంత వరకూ వాళ్ళ నాన్నగారే అనుకునేదాన్ని నేను .. వారి కుటుంభంలో మరే కారణమో తెలియదుకాని తన తల్లి తండ్రులు విడిగా ఉండేవారు .. తన అమ్మగారే జాబ్ చేస్తూ కుటుంభాన్ని పోషించేవారు.. మరి అందువల్లో ఎందువల్లో తెలియదుకాని ఇలా అయినదానికి ,కానిదానికి అబ్బాయిలతో గొడవ పెట్టుకుని వారి వల్ల చాలా చెడ్డ పేరు తెచ్చేసుకుంది .... చివరకు మా ఇంట్లో తమ్ముళ్ళు ,అక్కలు కూడా ఫలనా అమ్మాయి నీ ఫ్రెండా !! ఆ అమ్మాయి మంచిది కాదంట ఇంక స్నేహం మానేసేయి అని నా మీద ఒత్తిడి తెచ్చేవారు ... నేను అటు వాళ్ళతో వాదించలేక ఇటు తనను అకారణం గా దూరం చేయలేక సతమతమయ్యేదాన్ని...



ఇదిలా ఉండగా ఒక సారి తనతో కలిసి వాళ్ళింటికి వెళ్ళాను పని ఉండి .. కొంత దూరం వెళ్ళాక ఒక అబ్బాయి సువ్వి ప్లీజ్ రా ప్లీజ్ రా అని వెనకాతల పడటం మొదలెట్టాడు.. వాడి వెనకాతల ఒక గ్రూపు . యెహె పో.. ఒక్కసారి చెబితే అర్దం కాదా.. ఎక్కువ చేస్తే పోలీసులకు చెబుతా జాగ్రత్త అని వార్నింగ్ ఇస్తుంది ఇది ..... పోలీసులే కదా ఎవరి నెంబర్ కావాలో చెప్పు నేను ఇస్తా .. ప్రొద్దున్న లేస్తే మా బాబు చుట్టు తిరుగుతారు ..కాని నువ్వు మాత్రం కాదనకే బాబు నేనేమైపోతాను అని గారాలు కురుస్తున్నాడు వాడు.. ఈ శాల్తీని ఎక్కడో చూసానబ్బా??? నాకు గుర్తు రావడం లేదు .. ఈ లోపల జేబులో నుండి ఒక లెటెర్ తీసాడు.. అది చూడగానే ఇది మొహం అసహ్యం గా పెట్టింది .. . మళ్ళీ రాసావా దిక్కుమాలిన రక్తం తోటి ...ఏం తమాషాగా ఉందా ఊరుకుంటుంటే ..ఇలాంటివి మళ్ళీ ఇస్తే చెప్పు తీసికొడతా ఇది రెచ్చిపోయి తిడుతుంది.. నాకు తెలుసే బంగారం.. నామీద ఎంత ప్రేమ లేకపోతే నా రక్తాన్ని అలా తీయద్దు అంటావ్ ..సరేలే నెక్స్ట్ టైం ఇంకుతోనే రాస్తాను గాని ఈ సారికి అడ్జస్ట్ అయిపో అన్నాడు.. దీనికి కోపం వల్లో భయం వల్లో మాట తడబడిపోయి సరిగా మాట్లాడలేకపోతుంది ... సిగ్గులేదు ఈ వయసులో ప్రేమేంటీ ..నాకిష్టం లేదంటే ఇలా చంపుకు తింటావేంటి నా సంగతి నీకు తెలియదు బెదిరించింది.. నా సంగతీ నీకు తెలియదు.. నీకు ఆ విషయం బాగా తెలుసు .. ఎంటమ్మా ఈ వయసులో ప్రేమేంటీ అనేదానివి మొన్న లలితని వాసుగాడినీ ఎలా కలిపావే ఎదవ స్టోరీలు చెప్పకు ..వాడు ఏక వచనంలో మాట్లాడుతున్నాడు..
నా బుర్ర అంతా వీడిని ఎక్కడ చూసానా అని ఆలోచన ఒక పక్క ,భయం ఇంకోపక్కా.. ఈ లోపల నా వైపు తిరిగి మీరైనా చెప్పండీ మీ ఫ్రెండుకి అన్నాడు.. దెబ్బకు 102 నాకు ...
(చాలా పెద్ద పెద్ద పోస్ట్లు రాసేస్తున్నా, చదివేవారికి ఇబ్బందిగా ఉంటుందేమో.. ఎంత చిన్నగా రాద్దామన్న నా వల్ల కావడం లేదు అందుకే తరువాత భాగం తరువాత రాస్తాను )

ఉగాది శుభాకాంక్షలు చెప్పుకుందాం రండి

అందరికీ ఉగాది శుభాకాంక్షలు .. చిన్నప్పటి నుండి నాకు అర్దం కాని ప్రశ్న ఉగాది పచ్చడి మీద అన్ని కార్టూన్లు ఎందుకని ..ఉగాది అంటే నాకసలు పచ్చడివల్లే ఎంత ఇష్టమో .. నిజానికి మా ఇంట్లో అమ్మతప్ప అందరూ చేసేవారు ..ఇంట్లో చేసే అవకాశం పాపం అమ్మకు అసలు ఇచ్చేవారే కాదు .. ఎందుకంటే ఉదయమే దాదాపుగా 10 కుటుంబాలనుండి పదిరకాల పచ్చళ్లు వచ్చేసేవి మా ఇంటికి ..

అందరికంటే ఎక్కువగా పంపేవారు మా రాజు పెదనాన్న గారి కుటుంబం ..ఆయన అసలు పేరు ఠాగూర్ రాజు ..రాజు పెదనాన్న గారికి మా నాన్నమ్మ యశోదలాంటిది అన్నమాట.. చిన్నపుడు మా పెదనాన్న గారు చదివే స్కూల్ లోనే ఆయనా చదివేవారంట .. పాపం వేరే ఊరిలో నుండి వచ్చి ఇక్కడ చదవడానికి చాలా కష్టం గా ఉండేదని మా ఇంటిలోనే ఉండిచదువుకుంటా అన్నారంట .. అప్పటికే గంపెడు పిల్లలతో నెట్టుకొస్తున్న మద్యతరగతి కుటుంభానికి ..కలిగిన రాజుగారి అబ్బాయి ని పోషించడం మాటలు కాదు .. కాని అవి ఈనాటి రోజులా ?? అంతకన్నానా బాబు అని మా నాన్నమ్మ ఆయనను కూడా మా ఇంటిలోనే పెట్టుకుని కన్న తల్లి కంటే ఎక్కువగా చూసుకున్నారు .. ఆ రకంగా మా వాళ్ళకు ఆయన ఇంటికి పెద్ద అన్నయ్య అయిపోయారు ..


అప్పటి నుండి ఆయన తల్లిగారు బ్రతికున్నంత కాలం వారి ఇంటిలో ఏం పండగ వచ్చినా ముందు పిండి వంటలు మా ఇంటికే వచ్చేవి.. అబ్బ జున్ను పాలు,కొబ్బరి బొండాలు,పాలు,పెరుగు ,కూరగాయలు ఒక్కటికాదు తెగ పంపేవారు ఆవిడ ..నిజం గా రాజులంటే రాజులే అన్నంత అందం గా ఉండేవారు వారి కుటుంభంలో సభ్యులందరూ.. మా రాజు పెదనాన్న గారి ముగ్గురు కూతుర్లూ అందానికి అపరంజి బొమ్మలే .. వారి మాటలు, నడక భలే హుందాగా ఉండేవి .. ముట్టుకుంటే మాసిపోతారేమో అన్నంత అందం ..


ఆయనకు మా నాన్నమ్మ అంటే అపారమైన ప్రేమ ఉండేది.. తరచూ వారి పిల్లలతో ఇలా అనేవారు ..మా అమ్మ కూడా అంత బాగా చూడలేదేమో ..అలా చూసేది నన్ను ...తన పిల్లలకి పెరుగన్నం పెట్టి నాకు మాత్రం ఆంలెట్ ,కోడి కూరా వేసి పెట్టేది.. మళ్ళా ఏ రోజన్నా వండకపోతే తెగ అలిగే వాడిని.. అయినా కోపం తెచ్చుకోకుండా వండిపెట్టేది ... అని తెగ పొగిడేవారు ...అలాగే నాన్నను ,పెదనాన్నను మిగిలిన వాళ్ళను చూపి వీరురా నిజమైన అన్నదమ్ములంటే.. రాత్రిళ్ళు చలివేస్తే నాకు పరుచుకోడానికి, కప్పుకోడానికి మొత్తం దుప్పట్లు ఇచ్చి వాళ్ళు ఊరికే పడుకునేవారు .. అలా ఎప్పుడన్నా ఎక్కడన్నా చూసారా అని చెబుతుంటే చాలా గర్వంగా ఉండేది మా వాళ్ళను చూసి ..


ఆయన ఇంటినుండి వచ్చిన ఉగాది పచ్చడి తినకుండా మాకు ఉగాది ప్రారంభం అయ్యేది కాదు .. పెద్ద పెద్ద కేన్లతో ఇంటిల్లపాదికీ సరిపడేంత పంపేవారు .. బోలెడన్ని పిండి వంటలతో సహా ... అవి కాక మా పిన్నులు ,ఇరుగు పొరుగు కూడా తెగ పంపేవారు .. కాని ఈ పెద్దోళ్లు ఉంటారే ఏది ఇష్టమో అది మాత్రం వద్దు అనే చెబుతారు .. ఎక్కువ తినకు మంచిది కాదు ,ఎక్కువ తినకు మంచిది కాదు అని ఒకటే నస మా అమ్మ...

కాని అన్ని రోజులూ ఒకలాగే ఉండవుగా.. తప్పు ఎవరిదైతే నేమి, రాజు పెదనాన్న మా ఇంటి గుమ్మం తొక్కనని శపధం చేసి వెళ్ళి పోయారు ..ఆ తరువాత వారి పిల్లల పెళ్ళికి పిలవలేదు ..మా పెళ్ళిలకు వారూ రాలేదు ..కాని ప్రతి కార్తీక మాసం వారి పొలంలో జరిగే వనభోజనాలు ,వారి అమ్మగారి ఆప్యాయత అన్నీ మరిచిపోలేనివి ..అక్కడ నాన్న వాళ్ళు ఒక చోట అందరూ సరదాగా పేకాట ఆడుతుంటే ,అమ్మా వాళ్ళేమో చిన్న పిల్లల్లా పాటలు , ఆటలు ఆడేవారు.. పిల్లలం అందరం రకరకాల పువ్వులు ,ఆకులు ,గోరింటాకు కోసుకునేవాళ్ళం .. ఎంత బాగుండేదో ...కాని ఎంత పంతం అంటే ఆయనకు ... చివరకు నాన్నమ్మ చనిపోయినపుడు కూడా రాలేదు .. పాపం చివరి రోజుల్లో ఆయనను తలుచుకునేది తను..అప్పటి నుండి వద్దు అనుకున్నా ఆయన మీదకోపం వచ్చేది నాకు .. ఒకరిపైన కోపాన్ని ఇంటిల్లపాది పైనా ఎందుకు చూపారు .. నాన్నమ్మ కోసం అయినా రాలేదని..మొన్నామద్య మా పెదనాన్న గారు, నాన్న గారికి కనబడి చేసిన తప్పుకు బాధపడ్డారంట ...


ప్రొద్దున నుండి ఒకటే బాధగా అనిపించింది పాత రోజులన్నీ గుర్తువచ్చీ ..ఇక్కడికి వచ్చాక ఉగాది పచ్చడి లేదూ, ఆ సంభరమూ లేదూ.. వేప పువ్వు కొనాలంటే ఎక్కడికో వెళ్ళాలి .. పాపం ఆయన ఇంటికొచ్చే సరికి అర్దరాత్రి అయిపోతుంది ... వేప పువ్వు,మామిడి కాయ లేకుండా పచ్చడి చేసా గాని మొదటి సారి ఉగాది పచ్చడి మీద కార్టున్లు ఎందుకు వేస్తున్నారో నాకు అర్దం అయిపోయింది .. అసలే అత్తయ్య,అమ్మా అడుగుతారు పండగ ఎలా చేసుకున్నావు అని .. వేపపువ్వు కొనే తీరిక లేదని చెబితే అయిపోతాను..

ఇదిగో సరిగ్గా ఇప్పుడే పోన్ వచ్చింది పచ్చడి యే కాదు భోజనం తినడానికి కూడా వచ్చేయమని ఒక ఫ్రెండ్ ఆహ్వానం ...హమ్మయ్యా.. మరి మా వారికి చెప్పాలి ... చూసారా, కేవలం మీ అందరికీ శుభాకాంక్షలు చెబుదామని వస్తే ఏకంగా అదొక పోస్ట్ అయ్యి కూర్చుంది.. మరి నేను ఉగాది పచ్చడి తిని పండగ చేసుకుని వస్తా మరి .. అందరికీ నూతన సంవత్సర శుభాకాంక్షలు ...

ఈ కధ కు శీర్షిక ఏమ్ పెట్టనబ్బా ??????

నా హైస్కూల్ చదువు గురించి ఆలోచించినట్లుగా నా పెళ్ళి గురించి కూడా ఆలోచించలేదు మా నాన్న గారు ..విషయమేమిటంటే మా తాత గారు ఇంట్లో ఆడపిల్లలను కో ఎడ్యుకేషన్ స్కూల్స్ కి పంపించడానికి లేదా దూరం గా ఉన్న స్కూల్స్ కి పంపడానికి అంతగా ఇష్టపడేవారు కాదు..పైకి అనకపోయినా మా నాన్నగారి అభిమతం కూడా అదే ..మా ఇంటికి కాస్త దగ్గరలో గర్ల్స్ హై స్కూల్స్ రెండు ఉన్నాయి ..ఒకటి సెంటాన్స్ హైస్కూల్ ,రెండోది మునిస్పల్ గర్ల్స్ హైస్కూల్ .. కాబట్టి ఈ రెండిటిలో ఏదో ఒకదానికి తప్పని సరిగా ఓటు వేయాల్సిందే ..

అయితే గవర్నమెంట్ స్కూల్స్ లో సరిగా చదువు చెప్పరు అని మా అక్కను సెంటాన్స్ లోనే జాయిన్ చేసారు.. ఏ మాటకామాట చెప్పుకోవాలి ఆ స్కూల్ చాలా విశాలంగా ,చక్కని వసతులతో ,మంచి క్రమశిక్షణ తో అంతా బాగుండేది కాని ,మత విషయం లో కాసింత ఎక్కువగా పిల్లలకు ప్రభువు గురించి చెప్పేవారనుకుంటా..ఆ ప్రభావం మా అక్క మీద బాగా పడిపోయింది ..మిగిలిన పిల్లలు బాగానే చదువుకుని ఇళ్ళకు వచ్చేవారు..ఇది మాత్రం ఇంట్లో కూడా ప్రొద్దున టిఫిన్ తినడానికి ముందు ,తరువాత,భోజనానికి ముందు, తరువాత పడుకోడానికి ముందు ,లేవగానే ఒకటే ప్రార్ధనలు చేసేది .. గాజులు వేసుకునేది కాదు,బొట్టు పెట్టుకునేది కాదు ..ఆఖరికి పండగలకు కూడా ..ఎందుకంటే అలెర్జిగా ఉంది అని సాకు చెప్పేది .. ఇంటికెవరన్నా వచ్చి ఏమ్మా నువ్వు చక్కగా పాడతావంట కదా ఒక పాట పాడమ్మా అనగానే ..నడిపించు నా నావా ..నడి సంద్రమునదేవ అని మొదలు పెట్టేది ..దానితో ఆ వచ్చేవాళ్ళు మా నాన్న వైపు దానివైపు అనుమానంగా మార్చి మార్చి చూసేవారు ..దానితో ఠారెత్తిపోయి మా నాన్న గారు తిడితే ఏడ్చుకుంటూ గదిలోకి వెళ్ళి మిస్సమ్మలో సావిత్రిలా తలపై ఒక ముసుగేసుకుని కరుణించు మేరి మాత పాట వింటూ మౌనంగా రోదించేది..

ఈ కారణాలవల్ల మా నాన్న గారు ..చదివే రాత వుంటే ఎక్కడన్నా చదువుతుందిలే అని నన్ను మున్సిపల్ స్కూల్ లో జాయిన్ చేసేస్తా అన్నారు..ఆ మాట వినగానే మా నాన్నకు చెప్పే ధైర్యం లేక అది నన్ను పక్కకు తీసుకు వెళ్ళి ఒకటే గొడవ .. నీకేమన్నా మతి పోయిందా.. పోయి పోయి ఆ చెత్త స్కూల్ లో జాయిన్ అవుతావా.. మా స్కూల్ ల్లో నుండి మొద్దులు అని తీసిపడేసిన జనాలందరూ అక్కడ జాయిన్ అవుతారే..అక్కడ చేరావో నువ్వూ కూడా ఒక మొద్దులా తయారవుతావ్.. నా మాట విని అక్కడ వద్దు అని నాన్నకు చెప్పేసేయి అని నస పెట్టేసేది .. కానీ మరేమో నేను మా అక్కకు టొటల్ గా వ్యతిరేఖం ..నా కెంత సేపూ పూల జడగుప్పెసుకుని,పట్టు పావడా వేసుకుని, కళ్ళకు కాటుకా, కాళ్ళకు పట్టీలతో చెంగు చెంగున లేడిపిల్లలా తిరగాలని మహా కోరిక .. వాళ్ళ స్కూల్ లో లా గంట గంటకూ ప్రేయర్ చేయడం నా వల్ల కాదు.. అందుకే నేను మా నాన్న పార్టీ లో చేరిపోయి గవర్నమెంట్ స్కూల్ లోనే జాయిన్ అయిపోయా..

ఆ స్కూల్ లో చేరగానే నా పరిస్థితి ఎలా ఉందంటే పంజరం లో ఉన్న చిలకను బయటకు వదిలినట్లే..మిగిలిన స్కూల్స్ ఎలా ఉంటాయో తెలుయదుగాని మా స్కూల్ మాత్రం అసలు సిసలు గవర్నమెంట్ స్కూల్ కి ప్రతీక లా ఉండేది.. ఒక యూనిఫాం వేసుకు తీరాలని రూల్ లేదు,టీచర్స్ సరిగా ఉండేవారు కాదు,ఉన్నా చాలా వరకు సరిగా చెప్పేవారు కాదు, 30 మంది పట్టె క్లాస్ లో 60 మందిని ఇరికించేసేవారు.. ఎంచక్క బోలెడు కబుర్లు చెప్పుకోవచ్చు ..చదివినా,మానినా అడిగే నాధుడు ఉండేవాడు కాదు .. కొంత మంది అయితే ఏకం గా గోరింటాకులు పెట్టుకొచ్చేసి వెనుక బెంచి లో కూర్చునేవాళ్ళూ.. ఇంకొందరు చక్కగా ఊలు బండిలూ తెచ్చుకుని స్వెటర్ లు గట్రా అల్లుకునేవారు.. నాకూ కూడా నేర్పమంటే నీకు నేర్పించే టైము లో 4 స్వెటర్లు అల్లుకోవచ్చు అని దొంగమొహాలు నేర్పించలేదు అది వేరే విషయం అనుకోండి.. ఇలా నా చదువు 6 మాటలు 3 ఆటలతో 10 వ తరగతి వరకు వచ్చేసింది..
అయితే ఆ స్కూల్ లో అందరూ ఆకతాయి ,మొద్దులు కాకుండా నాకులా కాసింత చదువుకునే పిల్లలు కూడా ఉండేవారు వారిలో స్వాతి ,సత్య వగైర వగైరా అందరం కలిసి ఒక బెంచిలో కూర్చునే వాళ్ళం .. ఎప్పుడూ సోది కబుర్లే కాకుండా అప్పుడప్పుడు అందరం చదువుకునే వాళ్ళం ..ఒకరి డవుట్లు మరొకరం తీర్చుకునేవాళ్ళం ,, మా టీచర్లు స్కూల్ లో అంటే సరిగా చెప్పేవారు కాదుగాని వారిదగ్గర ట్యూషన్ పెట్టించుకుంటే అరటిపండు వలిచీ పంచదార అద్దినంత బాగా చెప్పేవారు.. పిల్లలను ట్యుషన్ లకు రాబట్టడానికి అదొక టెక్నిక్ ..

అయితే మా వెనుక బెంచీలో నా వెనుక కూర్చూనేది కుసుమ.. ఈ కధలో వీరోయిన్ ఆవిడే మరి.. కుసుమ అంటే అందరికీ హడల్ ..ఎందుకంటే అది దాని కంచు కంఠం తో ఒకేసారి 10 మంది తో గొడవపడి గెలిచే గయ్యాళీ పిల్ల .. దాని నోరుకి భయపడి ఎవరూ దాని జోలికి వెళ్ళేవారు కాదు..చదవడం మినహా దానికి అన్నీవచ్చు.. స్కూల్ ఎగ్గొట్టిసినిమాలు, షికార్లూ,ఆ వయసులోనే దానికో బోయ్ ఫ్రెండ్ ..మళ్ళీ వాడి మంచికోసం పూజలూ ..మొక్కులూ..ప్రదిక్షణాలు..ఉపవాసాలు..ఇలా అన్నమాట ..మరి నా ఖర్మ కాలో,పండో తెలియదు గాని దానికి నేను అంటే మహా ఇష్టం.. నన్ను మాత్రం ఏమీ అనేది కాదు..ఎదో ఒక సోది చెబుతునే ఉండేది.. కానీ పరిక్షలొచ్చాయంటే నా వెనుకనే పడేది.. ఇంక ఇస్స్ ,,ఇస్స్ అంటూ చూపించమని ఒకటే సౌండ్స్ చేస్తూ హింస హింస పెట్టెసేది.. నేను ఎలాంటిదాన్ని అంటే రాసే టైములో ఆకు కదిలిన చప్పుడువిన్నా.. ఏం రాయలేను.. మహ చిరాకు వస్తుంది..నోరుముయ్యి వెధవ సౌండ్స్ చేసావంటే చంపేస్తా అని తిట్టానో ..ఇంక మొదలు పెట్టేసేది ..అది కాదే నిన్న ఏమైందో తెలుసా మా అమ్మగారికి ఒంట్లో బాలేదు .. మొత్తం పని అంతా నేనే చేసాను.. నీకు తెలుసు కదా మా వీదిలో ఒకటే కుళాయి .. అక్కడి నుండి నీళ్ళు పట్టుకుని మెట్లు ఎక్కి ఇంటిల్లపాదికీ నీళ్ళు తెచ్చేసరికి ఎంత అలసిపోయానో తెలుసా అంటూ మొత్తం వర్ణించి వర్ణించి ఒక సెంటిమెంట్ సినిమా చూపించేసేది.. ఇలా మొత్తానికి ఎలాగయితేనో సాధించి చూసి రాసేసేది..

ఒక సారి మా హేడ్మాస్టర్ మన స్కూల్ కి కొత్త సైన్స్ టీచర్ వచ్చారని చెప్పీ ఒక ఆమెను పరిచయం చేసారు.. ఆమె బాగా పొట్టిగా తెల్లగా ఉన్నారు.. ఆవిడను చూడగానే కొందరు పక్కున నవ్వితే ఇంకొందరు పెదాల చాటున నవ్వును దాచుకున్నారు.. ఆవిడ అదేం పట్టనట్లుగా సీరియస్సుగా లెస్సెన్ చెప్పడం మొదలు పెట్టారు.. ఇంక వెనుక నుండి కుసుమ గొడవ స్టార్ట్ అయింది నాకు..ఏమే అడ్డుగా ఉండవా భయం గా ఉంది.... అడ్డుగా ఉండవా ఆవిడ చూస్తుంది అని నా వెనుక దాక్కుంటూ గోల గోల..నాకేమో చక్కిలి గింతలు వచ్చేసి కోపం వచ్చేస్తుంది.. యెహే.. వెధవ ఓవెర్ ఏక్షన్ చేయకు.. ఆవిడను చూసి నువ్వెందుకు భయపడటం అని ఒక్క గసురు గసిరాను చిరాకుతో .. ఆవిడ మా గుసగుసలకు వెనుకకు తిరిగి ఏమిటి మీరు సరిగా కూర్చోలేరా అని తిట్టి మళ్ళీ పాఠం మొదలు పెట్టింది.. ఆవిడ వెళ్ళేవరకు ఓపిక పట్టి కయ్యిమని లేచాను కుసుమ మీద.. అప్పుడు తాపీగా చెబుతుంది. అదికాదే ఈవిడ మొన్నే మా వీదిలోకి కొత్తగా అద్దెకు వచ్చారు .. కుళాయిదగ్గర నా వంతు అవ్వకుండానే ఆవిడ బిందె పెట్టింది.. నాకేం తెలుసూ ఆవిడే మనకి సైన్స్ టీచరుగా వస్తుంది అని.. అసలే చిరాకుగా ఉన్నాను ఆ బిందే ఎత్తి గిరాటేసి నాలుగు తిట్ట్లు తిట్టాను అందుకే కాసింత భయం వేసింది అంది .. నా..లు....గు తిట్లా ఏం తిట్టావ్ అన్నాను నోరు తడి ఆరిపోతుంటే .. అదే..ఏమన్నానబ్బా ..అని ఆలోచించి ..ఏమే పొట్టిదానా భూమికి జానెడు లేవు.. మద్యలో వచ్చావంటే బిందెతో పాటు నిన్నూ గిరాటేస్తాను అని అది ఇంకా చెప్ప బోతుండగా .. ఇంకా ఆపవే తల్లోయ్ .. నీ ఎంకమ్మా నువ్వు ఇలా తగులుకున్నావేంటే బాబు నాకు .. మొదటి రోజే నీతో చూసి నా మీద చెడ్డ అభిప్రాయాని కొచ్చేసి ఉంటుంది ఆవిడ ..ఇంక నీతో పాటు నేను ప్రతి చిన్న దానికి చీవాట్లు తినాలి అని తెగ బాధ పడిపోయాను..

అయితే నేను అనుకున్నట్లుగా ఆవిడ నన్ను ఎప్పుడూ తిట్టలేదు ...ఆ మాట కొస్తే కుసుమనూ ఏమీ అనలేదు..ఆ కారణం చేతనో మరి పాఠాలు బాగ చెప్పడం వల్లనో తెలియదుకాని ఆమే అంటే నాకు చాలా గౌరవం ఉండేది ... ఒక సారి క్వాటర్లీ పరిక్షలు వచ్చాయి .. ఆ రోజు సైన్స్ .. నేను చక చక రాసుకుంటున్నాను.. కుసుమ యధావిధిగా చూసి కాపి కొడుతుంది..నేను పేపర్ అంతా అయిపోగానే ఇంక సార్ కి ఇచ్చేద్దామని లేవ బోతుండగా ఏమే ప్లీజే ప్లీజే నేను సరిగా రాయలేదు నువ్వు టక టకా రాసేసావు ఆ లాస్ట్ ప్రశ్నకు జవాబు చెప్పవా అని నస ..ఆ ప్రశ్న ఏంటంటే మొక్కలకు నీరూ ,గాలి కావాలని ప్రయోగత్మకం గా వివరింపుము..ఇంక దీని బాధ పడలేక దాని ప్రశ్నా పత్రం తీసుకుని ఇలా రాసాను... అదేనే ఒక బీకరు తీసుకుని దానిలో ఒక పుల్ల కు మూడు విత్తనాలు కట్టి ఏడుస్తాం కదా ఒకటి నిండాగా మునుగుతుంది... ఒకటి గాలి లో ఉంటుంది... మద్యలోది గాలి నీరు తగిలేట్టుగా పెడతాం..అదే పెరుగుతుంది అది రాసి పడేయ్ అని రాసి దాని చేతికి ఇచ్చేసి వచ్చేసా..

ఆ తరువాతా మా సైన్స్ మేడం మార్క్స్ చెబుతూ క్లాస్లో ఒకరు చూసికాపీ కొట్టారు.. చూడటం ఎంత నేరమో దానికి సహకరించినవాళ్ళది కూడా అంతే నేరం కాబట్టి ఇద్దరు లేచి నిలబడండి.. అన్నారు.. నాకు గుండేల్లో రాయిపడింది .. అయినా బింకం గా ఆ రోజు నేను ఈవిడ క్లాసులో పడలేదు కదా నేను కాదులే అనుకున్నాను.. ఇంక లాభం లేదనుకున్నట్లు ఉన్నారు ఆవిడ ..కుసుమా లేచి నిలబడు నీకెవరు చూపారు చెప్పు అన్నారు.. ఎలా తెలిసింది ఈవిడకు అనుకుంటూ తప్పక లేచి నిలబడ్డాను ..ఆవిడ నన్ను చూసి ఏమనుకున్నారో సరే ఇంకెప్పుడూ ఇలా చేయకు అనేసి ఏ అమ్మాయ్ ఏంటి ఈ రాయడం అని పేపర్ ఇచ్చారు.. తీరా దాని పేపర్ చూద్దును కదా .. దానిలో నేను ఏమిరాసానో అదే మక్కీకి మక్కీ రాసేసింది.. విత్తనాలు కట్టి ఏడు ..అలా రాసి పడేయ్ వగైరాలన్నమాటా.. నాకు అది చూడగానే కళ్ళు అంటుకిపోయాయి.. ఏమే నువ్వు పనికి మాలినదానివని తెలుసుగాని ఈ రేంజ్ లో అనుకోలేదు ... నీకో నమస్కారమే బాబు అని దణ్ణం పెట్టేసా..

ఈ లోపల పబ్లిక్ ఎక్జాంస్ రానే వచ్చాయి.. అందరికీ టెన్షన్ యే .. రాత్రీ పగళ్ళు కష్ట పడి చదువుతున్నాం .. రేపు ఎక్జాం అనగానే ఈ రోజు రాత్రి నాకు మా అక్క హిత బోధ మొదలెట్టింది.. పబ్లిక్ పరిక్షలు అంటే ఏమనుకున్నావ్ .. మీ స్కూల్ లో రాసినట్లు అల్లాటప్పా గా ఉండవు.. ఏ మాత్రం చూపు తిప్పినా మాట్లాడినా పేపర్ లాగేసుకుంటారు.. ఎవరి స్లిప్ అన్నా పొరపాటున నీ బెంచ్ క్రింద కనబడినా డిబార్ చేసేస్తారు .. అని భయపెట్టెయడం మొదలెట్టింది.. నువ్వు ఆగవే బాబు అసలే టేన్షన్ తో ఏడుస్తుంటే అని విసుక్కున్నా ...

ఎక్జాం హాల్ చూడగానే ఏదో భయం.. అసలే కొత్త స్కూల్ కొత్త ప్లేస్ ఇంకా వేరే స్కూల్ పిల్లలు ,టీచర్లూ అని కంగారుపడుతుంటే యదావిదిగా నా వెనక నెంబరే వచ్చి హాయ్ అంది కుసుమ నవ్వుతూ .. అయిపోయానురా దేవుడో అనుకుని అయినా బింకంగా ఇదిగో రాసేటప్పూడు గాని విసిగించావో అయిపోయావే ... నీ పాట్లేవో నువ్వు పడు.. పిచ్చి కహానీలు చెప్పకు .. ఎక్కువ చేస్తే సార్ కి చెబుతా డిబార్ చేసి పడేస్తారు అని బెదిరించాను.. ఈ లోపల పరీక్ష మొదలైంది ..ఎన్ని చెప్పినా అది మళ్ళీ మొదలు పెట్టింది ప్లీజ్ వే అనుకుంటూ ..ఈ లోపల ఎవరో వచ్చీ గుమ్మం దగ్గర సార్ తో ఏదో మాట్లాడుతున్నారు.. దీని నస భరించలేక మెల్లిగా లేచాను సార్ అంటూ .. ఆయన లోపలకు వచ్చి నన్ను ఆగు అన్నట్లుగా సైగ చేసి ఓరే ఎస్.ఆంజనేయులు ఎవరురా అన్నారు.. ఒక అబ్బాయి లేచి నేనే సార్ అన్నాడు .. అతని దగ్గరకు వచ్చీ సరే ఇది రాయి అని అతనికో చిన్న పేపర్ ఇచ్చీ ఆ చెప్పమ్మా ఏంటి అన్నాడు నా వైపు చూస్తూ ...నాకు నోట మాట రాలేదు అంత పబ్లిక్ గా అతనికి సార్ నే స్లిప్ లు అందించడం చూసి .. అయినా తమాయించుకుని సార్.. ఈ అమ్మాయి ..మరేమో .. డిస్టర్బ్ చేస్తుంది అన్నాను నసుగుతూ .. మా కుసుమ సార్ని చూడగానే టప టపా రెండు కన్నీళ్ళ చుక్కలు కార్చీ మరేమో సార్ నిన్న అంతా జ్వరం అంటుండగానే ఆయన ఆపమన్నట్లు సైగ చేసి ఏమ్మా మీ ఫ్రెండేగా మళ్ళీ ఈ పరిక్షలయ్యాకా కలుసుకుంటారా ,పాపం కొంచం హెల్ప్ చేయండీ మరీ అంత స్వార్దం కూడదు.. అని తిరిగి నాకే చీవాట్లు.. అసలే టైం అయిపోతుంది .. తిట్టుకుంటూ కూర్చున్నా .. ఈలోపల సార్ ఆంజనేయుల వైపు చూసి ఏంట్రా నేను భిట్ పేపర్ ఇస్తే కొచ్చన్ పేపర్ లో ఎక్కించేస్తున్నావ్..అని పక్కన ఉన్న మరో మాస్టార్ తో చూసారా మాస్టారు ఇలా చదువుతున్నారు వీళ్ళు. వీళ్ళ నాన్న ఏమో ఎలాగన్నా పాస్ చేయించేమంటారు ఎలా చచ్చేది అన్నారు విసుక్కుంటూ .. మా దెయ్యం లాగే మహ పండితుడు అని తిట్టుకుంటూ పరిక్ష రాయడం లో పడిపోయాను ..

మొత్తానికి లెక్కల పరిక్ష వచ్చేసింది ..ఆంజనేయులకు మాత్రం అన్ని ఎక్జాంస్ లోనూ ఠంచనుగా స్లిప్ లు అందుతున్నాయి.. నాకు లెక్కలంటే మహ వణుకు.. ఏదో కష్టపడి రాస్తుంటే వెనుక నుండి అబ్బా సరిగా కనిపించడంలేదు .. కాస్త పక్కకు పెట్టి రాయి అని ఇది దిక్కుమాలిన డైరెక్షనులు ఇస్తుంది .. కాసేపటికి దానికి చిరాకు వచ్చేసి ఇలా కాదు గాని ఆ రాసిన పేపర్ ఇలా ఇచ్చెసేయి నేను ఎక్కించుకున్నాక నీకు ఇస్తా అంది తాపీగా.. నాకు తిక్క నషాళానికి అంటింది.. మొన్న అంటే ఒక చెత్త మాస్టర్ వచ్చారు.. అందరూ అలా ఉండరుగా అనుకుని విసురుగా లేవబోయాను.. ఈ లోపల మొదటి ఎక్జాం అప్పుడు వచ్చిన సార్ వచ్చారు ..ఈయన ఎవరురా బాబు నా ప్రాణానికి సరిగ్గా సమయానికి వస్తాడు అనుకున్నాను.. ఈ లోపల ఆయన మా క్లాస్ సార్ తో ఏదో మాట్లాడి ఎస్.ఆంజనేయులు ఒకాసారి లే అన్నారు ..ఆ అబ్బాయి లేచాడు .. ఏరా బాగానే రాసావు కదరా ఇంటిదగ్గర మీ నాన్నకు ఏమీ హెల్ప్ చేయలేదన్నావంట కదా అన్నారు కోపంగా.. ఆ పక్కన ప్యూన్ అనుకూంటా ఇతను కాదు సార్ ఆ అబ్బాయి అని మూలన బిక్కు బిక్కు మని చూస్తున్న మరో అబ్బాయిని చూసి ఈ అబ్బాయి నాన్న సార్ మొన్న వచ్చింది అన్నాడు .. అతని ని లేపి ఏరా నీ పేరు ఏమిటీ అనగానే ఎస్.ఆంజనేయులు అన్నాడు భయం భయం గా .. మరి ఇన్నాళ్ళు ఏం చెసావురా .. ఇదిగో అండీ ఇలా ఉంటారు అయోమయాలు .. అనుకుని గొణుక్కుని వెళ్ళీపోయాడు ... మా సార్ నా వైపు చూస్తూ ఏంటమ్మా అన్నారు.. దెబ్బకి నాకు ఏమనాలో తోచక మంచినీళ్ళు సార్ అని తప్పించుకున్నాను.. ఎలా అయితేనో మొత్తానికి ఎక్జాంస్ రాసా అనిపించి చివరకు ఫస్ట్ క్లాస్ కొట్టేసాను ..

చాలా నాళ్ళ తరువాత మా చదువులు పూర్తి అయ్యాక ఒక సారి ఆంజనేయ స్వామిగుడి దగ్గర కనబడింది కుసుమ ... చాలా ఆనందం వేసింది.. నువ్వేనా ..ఇలా చిక్కి పోయావ్ ఏమిటి..ఎలా ఉన్నావ్ అంటూ అని తెగ సంతోషం పడిపోయింది.. అది సరే గాని ఏమి చేస్తున్నావ్..ఇంతకీ నీ హీరో ని పెళ్ళి చేసుకున్నావా అన్నాను.. సామాన్యం గా అలాంటి పిచ్చి ప్రేమలు సక్సెస్ కావని నాకు తెలుసు ..ఏం చెప్పమంటావే ..మా చెల్లీ వాడు నన్నూ మోసం చేసారు ... ఇద్దరూ ఒకరోజు ఇంట్లోంచి పారిపోయి పెళ్ళి చేసుకున్నారు అని బాంబ్ పేల్చింది.. ఇద్దరూ చనువుగా మాట్లాడుకుంటుంటే మా చెల్లే కదా అనుకున్నాను ఇలా చేస్తుంది అనుకోలేదు అంది నీరసంగా మొహం పెట్టి.. కాని నాకు అప్పట్లోనె డౌటొచ్చింది అది చెప్పే మాటలు బట్టి.. సరేలే అలాంటి వాళ్ళ గురించి నువ్వు పట్టించుకోకు ..ఇంతకూ నువ్వేం చేస్తున్నావ్ అన్నాను అనునయంగా ..బాగా పేద కుటుంభం వారిది మరి.. పాపం వాళ్ళకు ఇంత కాలం అయినా పిల్లలు పుట్టలేదే అందుకే 108 ప్రదిక్షణాలు చేస్తాను అని మొక్కుకున్నా అంది పేపర్ పెన్ పట్టుకుని చూపిస్తూ ....ఎందుకో నాకా సమయం లో దాని మీద జాలి కాదు నాలుగు తన్నాలనిపించింది ...