లాస్ట్ పోస్ట్లో క్రికెట్ అంటే ఎందుకు ఇష్టం లేదో చెప్పాను కదా...మా పెద్ద అక్క అంటూ ఉండేది ..అమ్మాయిలు పుట్టింట్లో ఏది ఇష్ట పడరో అత్తింట్లో అదే మనకు ఎదురవుతుంది అని ..అంత పవర్ ఫుల్ మాటలను ఆ రోజుల్లో పెద్దగా పట్టించుకోలేదు:( మా ఆయన తనకి క్రికెట్ ఇష్టమంటే కాసింత భయపడినా పోనీలే యే 4 ,5 నెలలకోమారు ఆడేదానికి గొడవచేయడం ఎందుకులే అని మొదట్లో ఊరుకున్నాను.. కానీ నాకేం తెలుసు మా ఆయన వారానికి 2 సార్లు గ్రౌండ్ కి పారిపోతారని..శనివారం లీగ్ మేచ్ లని,ఆదివారం ఫ్రెండ్లీలని ఏంటో, ఏంటో అని పారిపోతారు..ఒక వేళ యే వారమన్నా మేచ్ లేదంటే, ప్రాక్టిస్ అనో ,ఆఖరికి ఎంపైరింగ్ చాన్స్ కూడా వదలరు.. భర్త క్రికెట్ కి వెళుతుంటే దేవుడా, దేవుడా ఈ రోజు వర్షం వచ్చేలా చేయవా అని కోరుకునే భార్యామణిని నేనే అనుకుంటా ..మా ఆయనకు క్రికెట్ అంటే ఇష్టం కాదు బాబోయ్ ప్రాణం..
నా కష్టాలన్నీ ఎలా మొదలు పెట్టి, ఏమని రాయాలో కూడా తెలియడం లేదు.. వచ్చిన క్రొత్తలో మా ఆయన ఎంతో ప్రేమగా, నా క్రికెట్ బట్టలన్నీ మురికిగా అయిపోయాయి కాస్త ఉతకవా , నాకు సరిగా ఉతకడం రాదుకదా అని జాలిగా అనేసరికి ,హృదయం ద్రవించిపోయి ..మై హూన్ నా డియర్, నేను మీ భార్యను,ఇది నా భాద్యత అని ఎక్స్ ట్రా లు చేసి ఆ బట్టలను బ్లీచ్ నీళ్ళలో ముంచి, సర్ఫ్ లో నాన బెట్టి చేతులు పడిపోయేలా బ్రష్ కొట్టి తెల్లగా మల్లెపూవులా ఉతికి ఇస్తే, రాత్రికి నూనెలో ఊరబేట్టిన ఊరగాయలా బురదలో ముంచి తెచ్చి ఇచ్చేవారు ..ఇదేంటండీ అని గట్టిగా అడిగితే మరి క్రికెట్ అంటే కేరం బోర్డ్ అనుకున్నావా షర్ట్ నలగకుండా వచ్చేయడానికి అని తిరిగి నన్నే అనేవారు..దెబ్బకు నాలో ఉన్న సతీ సావిత్రీ ని ప్రక్కన కూర్చోపెట్టి, నావల్ల కాదు నాయనా అని వాషింగ్ మిషన్ లో వేసేసేయడం మొదలు పెట్టాను..
అసలు క్రికెట్ మేచ్ ఉంది అంటే ఎంత హడావుడి పడతారంటే ,నాలుగు రోజులముందు నుండే వెదర్ రిపోర్ట్ చూడటం మొదలు పెడతారు..ఒక వేళ వాడు వర్షం వచ్చే సూచనలున్నాయి అంటే చూడాలి అయ్యగారి టెన్షన్ ..అదొక్కటేనా ,రేపు మేచ్ అనగానే ఈ రోజు రాత్రే క్రికెట్ కిట్ సర్దేసుకున్నా ,తెల్లారు జామున 5 గంటలకు లేచి మళ్లీ మొదలు పెడతారు సర్దుడు.. ఆ ముందు రోజు రాత్రి నుండే 'టీం 'లో ఎవరినీ ప్రశాంతం గా ఉండనివ్వరు.. సార్.. రేపు ఇన్నిగంటలకు మీరు బయలు దేరాలి గుర్తుందా అని వాళ్ళకి ఒకటే ఫోన్లు..తెల్లారిందంటే అందరికీ అలారం పీస్లా కాల్ చేసి నిద్రలేచారా ,రెడీ అయ్యారా అంటూ మేలుకొలుపులు ...అబ్బబ్బబ్బా ఒక్క గోలకాదు..మీరాడే తొక్కలో క్రికెట్కి ఇంత బిల్డప్పులు అవసరమా అంటే అనవే అను నెక్స్ట్ మంత్ జయసూర్యా వస్తున్నాడు అతనికి నేనే బౌలింగ్ వేస్తా అప్పుడు నువ్వే తెలుసుకుంటావ్ అని ఉడికిపోయేవారు .. గాడిదగ్రుడ్డు వాడెవడో వస్తే నాకేంటి అని తిరిగి తిట్టేదాన్ని..
ఒకసారి మేచ్ లేదు ఇంట్లోనే ఉన్నారు ..మద్యాహ్నం అవ్వగానే బుజ్జీ, ఏంటో ఈ రొజు కాస్త నీరసం గా ఉన్నట్లు కనబడతున్నావ్.. పోని ముస్తఫా వెళ్ళి నేను కూరలు తీసుకురానా ??నువ్వు రెస్ట్ తీసుకో అని అనేసరికి కరిగి కన్నీరయిపోయాను..పాపిష్టిదాన్ని ,ఏదో కాస్త సర్దాపడి క్రికెట్ కి వెళితే ఎన్నేన్ని మాటలనేదాన్ని అని నన్ను తిట్టేసుకుని, మరీ ఎక్కువ తీసుకురాకండి మోయలేరు ,ఏం తెచ్చినా తేవకపోయినా ఉల్లిపాయలు,టమోటాలు 1 కిలో తేవడం మరువకండే అని ప్రేమగా పంపించాను ..వెళ్ళిన మనిషి సాయంత్ర 6 అయినా రారే??..పోని ఫోన్ చేస్తే అది మెసేజ్ కి వెళ్ళిపోతుంది..ఈ లోపల ఆయన ఫ్రెండ్ భార్య నుండి ఫోన్ ..ఏమండీ ,మావారు ఫోన్ చేస్తె లిఫ్ట్ చేయడం లేదు ..మీవారికి మీరు 'కాల్' చేసి ఆయనకు 'కాల్' చేయమని చెప్పరా అని... ఈ రోజు మావారి కి మేచ్ లేదండి అన్నాను గర్వంగా ..తెలుసు అండి కాని మావారు ఆడుతున్న మేచ్ చూడడానికి వెళ్ళారుగా మా ఆయనతో కలిసి అంది ఆమె ..హార్నీ, ఎంత మోసం అనుకుని నేను కారాలు ,మిరియాలు ఒక గంట మెత్తగా నూరాకా ..అబ్బబ్బా ఎంత ట్రాఫిక్ అనుకున్నావే బాబు ...మధ్యలో నేను ఎక్కిన బస్ 2 గంటలు ఆగిపోయింది తెలుసా అన్నారు..ఎక్కడా ??మీ ఫ్రెండ్ ఆడుతున్న స్పోర్ట్స్ క్లబ్ దగ్గరేనా అన్నాను కోపంగా.. హి..హి దార్లోనే కదా అని అటువెళ్ళాను.. ఆ రెండు టీంలు మంచి టీంలు అందుకని ..,కానీ బుజ్జీ నీకు రెండు వారాలు సరిపడా కూరలు తెచ్చేసా అన్నారు.. నిజంగానే ఆయన చేతిలో పెద్ద పెద్ద బేగ్లు ..
సరే అని చూద్దును కదా 3 పెద్ద పెద్ద కట్టల తోటకూరా,3 కట్టల మునగాకు ,3 కట్టల పుదీనా..3 కట్టల పొన్నగంటి ఆకు,3 కట్టల గోంగూరా, 3 కట్టల కొత్తిమీర ,3 కట్టల పాల కూర.. ఏంటండీ ఇది ,నేనేమన్నా మేకను అనుకున్నారా ఇన్ని ఆకులు తెచ్చారు అన్నాను తెల్లబోతూ ...అంటే ఈ మద్య నీరసం అంటున్నావ్ కదే ,నీకు ఐరన్ బాగా పడుతుందనీ అని నసిగారు.. నేను సీరియస్ గా చూసేసరికి చిన్నగా నవ్వి మేచ్ టైము అయిపోతుంటే చేతికందింది కొనేసా ,నిజం చెప్పేసా కదా ఇంకలా చూడకు అన్నారు..భగవంతుడా అనుకుని పోనీ ఉల్లిపాయలు,టమాటాలు తెచ్చారా?? అన్నాను..ఉల్లిపాయలు మర్చిపోయా కాని టమోటాలు తెచ్చాను అన్నారు.సంతోషం, ఏవి ఇలా ఇవ్వండి అన్నాను ..2 బుల్లి టమాటాలు చేతిలో పెట్టారు ..ఇదేంటీ?? కిలో తెమ్మాన్నా కదా అన్నాను అయోమయంగా.. అవి కిలో ఉండవా బుజ్జి అన్నారు అమాయకంగా చూస్తూ ...మహానుభావా.. ఒక్కసారి మీ అమ్మగారిని తీసుకొస్తే పాదాభివందనం చేసుకుంటాను అన్నాను .. అన్నిటికి మద్యలో మా అమ్మను లాగుతావే అనుకుంటూ వెళ్ళిపోయారు.. క్రికెట్ పేరు చెపితే చాలు మా ఆయనకు అసలేం గుర్తుండదన్నమాట.
పోనీ ఆయనగారు ఆడే మేచ్ లు ప్రక్కన పెడితే ఇంట్లో అన్నా ప్రశాంతంగా ఉండనిస్తారా అంటే అదీ లేదు..ఈ.ఎస్.పి.ఎన్ ,స్టార్ స్ఫోర్ట్స్ చానెల్స్ ని ముందేసుకుని కూర్చుంటారు..ఆ చానెల్ వాళ్ళకు అంతకన్నా పనీ పాటా ఉండదు,ఎప్పుడో 25 యేళ్ళనాటి మేచ్ లను మళ్ళీ పది సార్లు త్రిప్పి, త్రిప్పి వేస్తుంటారు.. పోని చూసి వదిలేస్తారా ..ఈ బాల్ తర్వాత బాల్ చూడు బుజ్జీ భలే క్రాస్ అయ్యి వికెట్ కి తగులుతుంది.. నెక్స్ట్ ఓవెర్ లో వీడు సిక్స్ కొడతాడు అని అంటుంటే మీరు చెప్పండి తిక్క నషాళానికి అంటుందా లేదా..
ఒక రోజు ఎంతో విచారంగా అంతా బ్రాంతియేనా ,జీవితానా వెలుగింతేనా అని పాడుకుందామని మొదలు పెట్టాబోయేంతలో, నా అంతరాత్మ డింగుమని వచ్చి ఎంత సేపూ మీ ఆయన్ని తిట్టేబదులు, అచ్చిక బుచ్చికలాడి నీ వైపు మార్చుకోవచ్చు కదా,అసలు తప్పంతా నీదే, నీదే, నీదే అని నాలుగు వైపులా రౌండులు తిరిగి మరి వాయించేసింది ..ఛీ,ఛీ చిన్నప్పుడు బ్లాక్ అండ్ వైట్ సినిమాలు మరీ ఎక్కువగా చూడటం తప్పైపోయింది అని తిట్టుకున్నా ..ఇదీ పోయింటే కదా ఓ సారి ట్రై చేద్దాం అనుకున్నా..
ఓ రోజు మా ఆయన ఇంటికి రాగానే ,హడావుడిగా టి.వి పెట్టి, నిన్న రాత్రి తెల్లార్లూ జాగారం చేసి చూసిన..మనోళ్ళు ఓడిపోయిన మేచ్ ను ప్రొద్దున్న రెండుసార్లు హైలెట్స్ చూసి, ఆఫిస్ కి వెళ్ళాకా అడ్డమైన పేపర్లలో మళ్ళీ చదివీ ,ముచ్చటగా మూడో సారి చూస్తుండగా...నేను ఎంతో ఆహ్లాదంగా నవ్వుతూ ప్రక్కన కూర్చుని.. ఏమండీ !ప్రొద్దు గూకింది..పక్షులు ఇళ్ళకు చేరే వేళయ్యింది..మనం ఎంచక్కా ఆ ఎదురుగా ఉన్న పార్కులో బెంచ్ మీద కూర్చుని , ప్రక్కనే ఉన్న సెంటుమల్లి చెట్టు నుండి వచ్చే పరిమళాలను పీలుస్తూ ,పైన చందమామను చూస్తూ ,పక్షుల కిల ,కిల రావాలను వింటూ కబుర్లు చెప్పుకుందామా అన్నాను గొముగా.. ఏమనీ,చిన్నపుడు మీ ఎదురింటమ్మాయి 20 చుక్కల ముగ్గువేస్తే నువ్వు ఆవిడకు దీటుగా 30 చుక్కల ముగ్గు ఎలా వేసావో ,మీ అక్క పెళ్ళి అయి వెళుతుంటే మీ నాన్న ,నువ్వు గోలు గోలు మని ఎలా ఏడ్చారో 108 సారి చెప్తావ్ అంతే కదా.. ఆ సుత్తి కోసం అన్ని సెటప్పులవసరం అంటావా ??.. కావాలంటే ఫ్రిజ్ పైన ఉన్న జాస్మిన్ రూం ఫ్రెష్ నర్ స్ప్రే చేసి ,ఆ సీలింగ్ లైట్ నే చందమామ అనుకుని ఇక్కడే చెప్పు అన్నారు టి.వీ పైనించి కళ్ళు త్రిప్పకుండా ..అప్పుడే నాకొక డవుటొచ్చింది.. తెలిసినవారు చెప్పండి..పెళ్ళాం,బిడ్డలని పట్టించుకోకుండా ఇంట్లో వదిలేసి ఇలా క్రికెట్కి,టీ.విలకు అతుక్కునిపోయి హింసించేవాళ్ల పై గృహహింస చట్టం క్రింద కేసు వేసే వీలుందా..???
ఇలా మా కాపురం కొంచెం ఇష్టం,కొంచెం కష్టం గా జరిగిపోతున్న సమయంలో ఒక రోజు నేను తీవ్రంగా అలిగి కూర్చున్న వేళ, మా ఆయన రాజీ కొచ్చారు..తప్పు ,తప్పు నన్ను రాజీ పడేలా చేసారు.. అసలు మగవాళ్ళలో ఉన్న గొప్పతనం అదే, తగ్గుతున్నట్లు నటిస్తూ తొక్కేస్తారు.. సరే కధలో కొచ్చేస్తే ..అదికాదు బుజ్జీ నీతో ఇదే చిక్కు ,ఎంత సేపూ నీకన్యాయం జరిగిపోతుంది అని ఆలోచిస్తావ్ కానీ ,ఎలా ఆనందం గా ఉండాలని ఆలోచించవు..ఇప్పుడు నన్ను క్రికెట్ కి వెళ్ళ కుండా ఆపలేవు,పోనీ నువ్వు రావచ్చుకదా నాతో .. అప్పుడు యేం గొడవా రాదు ఎప్పుడూ నా దగ్గరే ఉంటావ్ ,మా ఫ్రెండ్స్ భార్యలు లందరూ వస్తారు ..పైగా ఎంత హాయిగా ఎంజాయ్ చేస్తారో తెలుసా ..తొక్కలోది ఒక్క రన్ తీస్తేనే చప్పట్లు కొట్టి ఎంకరేజ్ చేస్తారు వాళ్ళ హజ్బెండ్ని,కానీ నువ్వేమో రావు అన్నారు.. పైకి నేను రాను,నా కిష్టం ఉండదు అని కాసేపు తగవులాడినా,మనసులో .. పోని ఇంట్లో ఇలా తిట్టుకుంటు కూర్చుని చేసేదేముంది కనీసం కళ్ళముందు అయినా ఉంటారని సరే అన్నాను ..
ఇంట్లో సోఫా ప్రక్కన టేబుల్ పై మంచి నీళ్ళ బాటిల్ ఉంటే ,దాన్ని తీసుకోవడానికి బద్దకం వేసి నన్ను పిలిచి మరీ మంచినీళ్ళు తెప్పించుకునే మా ఆయన ,రెండు బస్తాల్లాంటి క్రికెట్ కిట్లను రెండు చేతులకు తగిలించుకుని మరీ కేబ్ కోసం పరిగెడుతుంటే నవ్వాలో ఏడవాలో అర్ధం కాలేదు నాకు.. సరే ,వస్తా అని మాటిచ్చాను కాబట్టి ఆయనతో బయలు దేరాను..కేబ్ దిగి రోడ్ కి అవతల వైపు ఉన్న క్రికెట్ గ్రౌండ్ చూస్తూ బ్రిడ్జ్ ఎక్కుతుంటే .. నాకు ఈ బ్రిడ్జ్ ని చూస్తే ఎంత బాధ అనిపిస్తుందో తెలుసా ..అక్కడ గ్రౌండ్ చూస్తే నా మనసాగదు, ఇప్పుడు ఇదంతా దాటాలా అనిపిస్తుంది ..ఇలా మాయమై అలా అక్కడకు చేరిపోవాలని ఉంటుంది అన్నారు.. ఒక్క రోజన్నా నా గురించి ఇలా అన్నారా ??..పైగా ఏమన్నా అంటే నీ మీద ప్రేమ మనసులో ఉంటుంది.. సినిమా డయిలాగులు చెప్తేనే ప్రేమనుకుంటావ్ నువ్వు అని తిరిగి నన్నే తిడతారు ..ఏంటో ఈ మగవాళ్ళు ..ఈ జన్మకు అర్ధం కారు తిట్టుకుంటూ క్రికెట్ క్లబ్ కి చేరుకున్నాం..అలా క్లబ్ లో అడుగుపెట్టామో లేదో ,మా ఆయన నన్ను ఒక టేబుల్ దగ్గర కూర్చో పెట్టి ..ఇదిగో ఇక్కడి నుండి చూస్తే బాగా కనబడుతుంది.. అందరినీ పరిచయం చేసుకో ..మొద్దులా కూర్చోకు.. ఏం కావాలంటే అది తెప్పించుకో అని నా మాట కూడా వినకుండా ఫ్రెండ్స్ మద్యలోకి పారిపోయారు ...
ఓ మారు చుట్టూరా చూసాను.. అక్కడక్కడా ఫారినర్స్ ,చాలా మంది నార్త్ ఇండియన్స్ .. స్లీవ్లెస్ డ్రేస్లతో ,రీ బౌండింగ్ హెయిర్లతో ..చక్కగా ఒక బీరో ,వైనో త్రాగుతూ కిల ,కిలా కబుర్లు చెప్పేసుకుంటున్నారు..మన అవతారం చూసుకున్నాం.. చక్కగా బిగించిన జడ తో, తిలకం బొట్టు తో( ఇది మా నాన్న ఆర్డర్ ..పెళ్ళయిన అమ్మాయిలు స్టిక్కర్లు పెట్టకూడదంట ) ఆ క్రింద కొంచెం కుంకుమ బొట్టుతో ( ఇది మా అత్తగారి ఆర్డర్) పట్టీలు కూడా మిస్ అవ్వకుండా అప్పుడే ఎర్ర ప్లయిట్ దిగి వచ్చిన అచ్చమైన అప్పలమ్మలా ఉన్న నేను సహజంగానే నచ్చలేదు వాళ్ళకు.దాంతో పలకరిస్తే ఒక నవ్వు పడేసి (కొందరు అది కూడాలేదు) మొహాలు తిప్పేసుకున్నారు ..మనకసలే పావుగంట కంటే మౌనంగా ఉండటం అలవాటులేదాయే.. అలా తిరునాళ్ళలో తప్పి పోయిన పిల్లలా దిక్కులు చూస్తుంటే ,ఎవరో తెలుగులో మాట్లాడుతున్న ముక్కలు విని ప్రాణం లేచొచ్చినట్లు అనిపించి ఆమె ప్రక్కన చేరిపోయాను..
సరే, పలకరింపులయ్యాకా ,మీరు కెప్టన్ గారి వైఫా మరి చెప్పరే నేను ఫలానా అతని వైపుని ..మీ వారు చాలా బాగా ఆడతారు అన్నాది..ఆహా అన్నాను.. పాపం వాళ్ళయనను నేనూ పొగుడుతా అనుకుని కాసేపు చూసింది కాని మనకసలు ఎవరి పేరూ తెలియదు కాబట్టి ఊరుకున్నా..కాసేపు ఆగి మావారు ఆల్రౌండరే ,మొన్న 3 వికెట్లు తీసి 20 రన్లు చేసారు..'మేన్ ఆఫ్ ది మేచ్ 'ఆయనకే వచ్చింది మీవారు చెప్పలేదా అంది.. నాకు క్రికెట్ అంత గా ఇష్టం ఉండదు లెండి.. ఇంట్లో అంతగా మాట్లాడుకోము దాని గురించి అన్నాను..తను అలా క్రికెట్ విషయాలు తప్ప ఇంకొకటి మాట్లాడక పోవడం నాకు నచ్చలేదు.. నాకైతే క్రికెట్ పిచ్చి ,అయ్ లవ్ క్రికెట్ అంది తన్మయత్వంగా కళ్ళు మూసుకుని..నాకెక్కడ దొరికావే బాబు నువ్వు తిట్టుకున్నాను విసుగ్గా..ఆమె మద్య మద్యలో 'ఫోర్'..' సిక్స్' అని గట్టిగా అరిచి చప్పట్లు కొడుతూ మీకు తెలుసా ప్రతి వీక్ మేచ్ ఆడమని మావారిని అడుగుతా కాని ,ఆయన ఆడరు.. మహా లేజీ మా వారు అంది ముద్దు,ముద్దు గా విసుక్కుంటూ.. ఇదేంటబ్బా ఈ అమ్మాయికి లేస మాత్రం బాధలేదు ఒక వేళ తప్పు నాదేనా?? నేనే ఎక్కువగా ఆలోచించి బంగారం లాంటి మా ఆయన్ని బాధ పెట్టేస్తున్నానా??? లాంటి ఆలోచనలు వచ్చేసాయి అరనిమిషంలో ..
మీరేంటీ అసలు చప్పట్లు కొట్టడంలేదు ..కమాన్ మనం ఎంకరేజ్ చెస్తేనే వాళ్ళు బాగా ఆడతారు అంది .. మరీ,మరీ మీకు బాధ అనిపించదా మీవారితో ఎక్కువ టైం స్పెండ్ చేయలేకపోతారని అన్నాను ఆరాగా ...బాధ ఎందుకు మేచ్ అయిపోయిన వెంటనే మా ఆయన నన్ను షాపింగుకి తీసుకు వెళతారుగా ..అది మా ఇద్దరిమద్యా ఒప్పందం అంది 'కమాన్.. సిక్స్ మారో 'అంటూ అరుస్తూ .. ఓసినీ !!ఇదా సంగతి ..నాకా దిక్కుమాలిన షాపింగ్ అలవాటు లేదే.. పైగా ఆయనగారు కొన్నా, వద్దులేద్దురు ఇప్పుడేం అవసరం అంటూ వెనక్కులాగుతా.. పుట్టుకతో వచ్చిన బుద్ది .. మనసులో తిట్టుకుంటూ చప్పట్లు కొట్టాను.. అదేంటీ ఎందుకు క్లాప్స్ కొడుతున్నారు అంది నావైపు విచిత్రంగా చూస్తూ..ఎంకరేజ్ చేద్దామని అన్నాను..అవుటయ్యింది మీ ఆయనే అంది నెమ్మదిగా... గొడవ వదిలిపోయింది మనసులో తిట్టుకుని హి..హి అని ఒక నవ్వు విసిరాను ..
కానీ ఆ రోజు మేచ్ అయిపోయినా ఎంతకీ రారు..అంతకీ రారు నా దగ్గరకు.. ఫ్రెష్ అవ్వాలని డ్రెస్సింగ్ రూం లో ఒక గంట ,ఎందుకు ఓడిపోయారో సుత్తికొట్టుకుంటూ 2 గంటలు..నీది తప్పని కాదు నీవల్లే ఓడిపోయాం అని ఒకరినొకరు తిట్టుకుంటూ ఒక 2 గంటలు... విసుగొచ్చి బాబూ , మళ్ళీ ఇంకోసారి వస్తే పాత చెప్పు తీసుకుని కొట్టండి అని తిట్టి ఇంటికివచ్చేసాము ..అబ్బే, ఆ రోజు మేచ్ ఫలానా వాడివల్ల ఓడిపోయాం అందుకే లేట్ అయింది అని ఎంత చెప్పినా తరువాత నేను వెళ్ళలేదు..ఆ తరువాతా వాళ్ళ 'టీం' లో చాలా మంది తెలుగువాళ్ళు పరిచయం అయ్యారు..
ఒకరోజు ఒక ఫ్రెండ్ వైఫ్ తో ఫోన్ లోమాట్లాడుతుంటుంటే, మాటల మధ్యలో క్రికెట్ గురించి వచ్చి.. అబ్బా ఏం క్రికెట్టోనండి బాబు ప్రొద్దున వెళ్ళిన మనుషులు రాత్రివరకూ రారు.. పైగా ఇంటర్ నేష్నల్ మేచ్లా ఫ్లెడ్ లైట్స్ వెలుగులో కూడా ఆడతారంట అన్నాను .. ఏంటీ, వాళ్ళు చెప్పిన మాటలు నమ్మేసారా అన్ని అబద్దాలే నమ్మకండి అంది..కాదులెద్దూ చాలా సార్లు మా ఆయన ఫీల్డింగ్లో ఉండగా ఫోన్ చేసాను ..మేచ్ నైట్ 7 వరకూ జరుగుతుంది అన్నాను .. ప్లిచ్ ,మీరింకా ఎదగాలండీ బాబు...అసలు వీళ్ళు ఫీల్డింగ్ చేసినపుడు ఫోన్ లిఫ్ట్ చేయడం ఒకటి ..మీలాగే మొదట్లో మేమూ అమాయకం గా నమ్మేసాం.. ఒకసారి సర్ ప్రైజ్ చేద్దామని నేను, ఇంకో ఫ్రెండ్ గ్రౌండ్ కి వెళ్ళి చూస్తే అందరూ హాయిగా కబుర్లు చెప్పుకుంటున్నారు ..ఇంట్లో మేచ్ ఇంకా అవ్వలేదని చెప్పి ఇదా మీరుచేసే పని అని చెట్టు చాటున నించుని మా ఆయనకు ఫోన్ చేసాం.. వెంటనే మా ఆయన అరే ..ఫీల్డింగ్ లో ఉన్నాను అని ఒకటే జీవించేస్తున్నారు... మా ఫ్రెండ్ వాళ్ళ ఆయనైతే బాత్రూం లో ఉండగానే అరే మేచ్ మాంచి సస్పెన్స్లో ఉంది డిస్టర్బ్ చేయకూ అని తలుపు తీసి మమ్మల్ని చూసి కంగారు పడిపోయారు అంది.. నాకు డవుటొచ్చి ఒక్క నిమిషం నేను మళ్ళీ చేస్తా అని ..మా ఆయనకు ఫోన్ చేసాను.. అబ్బా ,ఫోన్ పెట్టేసేయ్ బంతి గాల్లో ఉంది కేచ్ చేయాలి మా ఆయన అటు ఫోన్ ఆఫ్ చేసేసారు ...
